Республикысе Гигиене да эпидемиологий рӱдерын, СПИД-рӱдерын лабораторийлаштышт коронавируслан тергаш тӱҥалме жап гыч 21 апрель марте чылаже 12524 шымлымашым эртарыме.
Роспотребнадзорын Марий Элысе виктемжын палдарымыж гыч, таче, 21 апрельыште, у коронавирус инфекций дене авалталтме эше 20 у случайым официально регистрироватлыме. Тыге, республикыштына тиде кече марте COVID-2019 дене чылаже 311 еҥ черланен, 46 пациент паремын да икте колен. Пытартыш суткаште рашемдыме чыла случай тымарте черланыше-влак дене кылым кучымо дене кылдалтын.
Инфицироватлалтше-влак коклаште 1 ияш марте ик йоча, 1 гыч 6 ияш марте 10 икшыве, 7 гыч 14 ияш йотке 7 ӱдыр-рвезе, 15 гыч 17 ияш марте 8 подростко, 18 гыч 29 ияш йотке 33 еҥ, 30 гыч 49 ияш марте 103 граждан, 50 гыч 64 ияш йотке 104 еҥ улыт. 65 ий деч кугурак-влакын черланымышт шотышто 45 случайым регистрироватлыме.
311 гыч 79 еҥ коронавирус дене черланымыжым нигузеат огеш шиж, 140 гражданын тазалыкше «нелылыкын куштылго йыжыҥже» семын аклалтеш, 74 еҥын – «нелылыкын кокла йыжыҥже» семын, 18 еҥ неле состоянийыште.
1091 еҥым, ты шотыштак у коронавирус инфекций дене авалталтын кертше-влак дене кылым кучышо 1070 гражданым, медицине велым эскерат. Учёт гыч чылаже 3094 еҥым кораҥдыме.
Кызыт поснак кугу тӱткыш тӱшкан пайдаланыме вер ден транспортым дезинфицироватлымылан ойыралтеш. Эпидемий ситуаций саемме марте тудым кече еда ышташ кӱлеш.
Виктем тыгак граждан-шамычлан шуко еҥ улман верлаште да уремыште маске режимым шукташ темла.
М.ИВАНОВА
