26-28 июльышто Марий Элыште Can—Am X Race 2017 Всероссийский квадрокудалыштмаш эртен.
Россий кӱкшытыштат квадрогонщик-влак шкешт тудым ик эн кугу семын палемденыт. Республикыш 50 наре мотовездеход ден квадроциклым виктарыше экипаж-влак толыныт. Нуно Изи Какшан серыште, ий полат воктене лӱмын келыштарыме лагерьыште иленыт. Туштак штаб вераҥын ыле.
Торжественный почмаш деч ончыч нуно административный да технический тергымашым эртеныт. Верысе-влакат ончалаш да палыме лияш миен кертыныт. Тӱҥ шотышто гонкышто участвоватлыше экипаж-влакын квадроцикл ден вездеходышт йот эллаште ыштен лукмо улыт. Российысыже лач ик командын веле, Ярославский областьысе Рыбинск ола гыч толшо Михаил Орлов ден Алексей Зверевын (снимкыште066)квадроциклышт. Нуно коктын «Русская механика» командыш ушненыт.
Гонкыш толшо-влак коклаште квадрогонко спорт дене Москва гыч ик мастер лийын, тиде — Игорь Хмельницкий. Тудо йолташыже-влак Максим Камышов, Алексей Донов дене пырля «Ночные волки» командыш чумыргеныт (снимкыште107). Чынжым каласаш гын, тыгай кужу пагыт дене эл мучко квадроцикл дене кудал эрташ — манаш веле. Каласкалымышт гыч умылет: тӱрлӧ случай лиеда, пижытат. Икманаш, лудыкшӧ уке огыл, но адреналиным налаш шонымашак огыл мо нуным тыгай раллиш ушнаш таратен.
Вес кечынже гонщик-влак Йошкар-Оласе Красноармейский слободасе трассыште 4,5 километр кужытышто таҥасеныт. Вара Медведево, Звенигово, Оршанке, Советский районлаште тыгак кугу скорость дене кудалыштмашмаште шкеныштым тергеныт.
Тыгай таҥасымашым чынжымак ончаш оҥай. Но тидлан кызыт лачшымак таҥасыме трассыш коштмат ок кӱл.Спутник мониторинг системылан кӧра онлайн-йӧн дене пайдаланаш лиеш. Кум кече жапыште экипаж-влак тӱрысшӧ Марий Элыште 700 наре километрым эртат.
С.Носова.
Снимкылаште:
Йошкар-Ола гыч квадрогонщик-влак Руслан ден Денис Насибуллинмытлан спонсор-влак кок квадроцикллан сертификатым кучыктат.
М.Скобелевын фотожо.
