20 май — 1 июль жапыште республикыштына 294 илалше еҥ кочкыш йöрвар полышым налеш.
Марий Элын Калык илышым саемдыме шотышто министерствыже «Неотложка» поро кумыл акцийыш ушнен. Кугу нелылыкыш логалше айдемылан полшымо икымше правил пукшымо да ырыктыме дене кылдалтын.
«Неотложка» проект – тиде тÿнен илыше шоҥгыеҥ-шамычлан кочкыш йöрвар да пу дене полшымо поро кумыл паша.
Илалше еҥ-влаклан кочкыш йöрвар да пу дене полшымо пашам министерстве «Старость в радость» фонд дене пырля тÿҥалын. А тыгай полыш шотышто тÿнен илыше еҥ-шамычын спискыштым районласе калыкым социально обслуживатлыме комплексный рÿдер-шамычын увертарымышт негызеш ямдыла.
Проект кышкарыште социальный службын пашаеҥже-шамыч базовыйлан шотлалтше кочкыш наборым ямдылат, тушко макароным, тÿрлö шÿрашым, пакчасаска, шыл да кол консервым, сакырым, нугыдемдыме шöрым да молымат пыштат. Ик наборын нелытше – 14 килограмм, суммыжо – 5 тÿжем теҥге. Тиде продукт дене шоҥгыеҥ икмыняр жап утыжым тургыжланыде илен, а аныклыме оксашкыже эмым але кÿлешан арверым налын кертеш.
Кочкыш йöрвар наборым социальный пашаеҥ-влак илалше еҥ-шамычлан мöҥгышкыштак намиен пуат.
Тыгай шотан полышым тений квартал еда ышташ палемдыме.
Тылеч посна, фонд коҥга дене ырыктыман пöртлаште илыше шоҥгыеҥ ден пенсионер-шамычлан пум налаш да конден пуаш оксам ойыра. Пум кугу ийготлан да начар тазалыклан кöра шке семын ямдылен кертдыме, тыгак нужнан илыше-влаклан капка ончыкыштак конден пуат. Тыгай полышым республикнан яллаштыже илыше 100 утла шоҥгыеҥ налеш.
М.ИВАНОВА
