Кеҥеж каныш жапыште тунемше-влак жапым тӱрлын эртарат.
Школлаште шинчымашым погышо-влак канат гын, техникум ден вузлаште тунемше-шамыч кокла гыч ятырынже пашам ыштат.
Тыгодым иктышт студент паша отрядыш ушненыт, а весышт шке специальностьышт дене паша верым муыныт.
Студент отряд-влак шотышто ойлаш гын, Марий Элыште «Российысе студент отряд-влакын» регионысо пӧлкаже чолган пашам ышта. Пытартыш кок ийыште тудо тӱжем утла ӱдыр-рвезым уша, а кеҥеж каныш жапыште 500 утла студентлан паша верым муаш да оксам ыштен налаш полша. Мемнан ӱдыр-рвезе-влак тений Камчатке гыч Крым марте тыршат. Мутлан, тазалыкым пеҥгыдемдыме да каныме кеҥежымсе кампаний тӱҥалтыш гычак «Йода» педагогический отрядын еҥже-влак (Марий кугыжаныш университетын пеленысе) йоча лагерьлаште вожатыйлан тыршат, «Юность» студент отряд Амур областьысе газохимический комбинатыште чоҥымо пашаште шуаралтеш, «Марий Эл» – регион-влак кокласе чоҥымо пашаште (Мутлан, «Алабуга» экономике кумдыкышто), «Необъятный океан» – Камчатске кундемысе «Камбер» ООО-што. Колым да теҥыз продуктым перерабатыватлыше да консервироватлыше тиде предприятийыште Российысе кум регион гыч 100 наре студент пашам ышта. Республикна гыч «Атлантида» студент отряд Камчатке кундемыш каен: кызыт ӱдыр-рвезе-влак тусо «Мэтскай» ООО-што улыт. Палемдыме предприятийлаште паша куштылго огыл: студент-влак колым перерабатыватлыме тичмаш циклыш ушнат. Тиде кечылаште отряд «Камбер-Пымта» регион-влак кокласе паша проект кышкарыштыже «Визитный картычке» конкурсышто шкеж да Марий Элна дене палдарен. Отряд Марий кугыжаныш университет пелен 2024 ийыште шочын, негызым пыштышыже да командирже – Эльвира Салахова. Тудын палемдымыж почеш, колым перерабатыватлыше предприятийыште 45 кече пашам ыштымылан студент эн шагалже шӱдӧ кумло тӱжем теҥге кугытан пашадарым налеш, эше кум арнялан кодеш – кумшӱдӧ тӱжем теҥге утлам.
Республикнан студентше-влак тыгак кажне ийын поездлаште проводниклан пашам ыштат. Тений нуно Озаҥ – Адлер направленийыште, Санкт-Петербургысо кӱртньӧ корно сетьыште тыршат.
Техникумышто тунемше-влакат кеҥеж жапыштым арам огыт эртаре. Теве Транспортно-энергетический техникумын икмыняр студентше Российыште ик эн кугулан шотлалтше «Водоходъ» эҥер круиз (Юл, Кама, Дон, Енисей, Лена да моло эҥер-влак мучко) да туризм дене операторын теплоходлаштышт тыршат.
«Повар да кондитер паша» специальность дене умбакыже илышыжым кылдаш шонышо Михаил Архипов иктыштыже стюардлан пашам ышта. Рвезе сай тунемше гына огыл, тудо пашам ышташ йӧратыше: занятий деч варат яра шинчен ок керт, а кужу кеҥеж жапыште – поснак. Тиде специальность денак тунемше Антон Балашоват канышым пайдалын эртара: тудо «Водоходъын» теплоходыштыжо – суднын поваржын полышкалышыже. «Суднын поварже» специальностьшо – ешартыш, тудым техникумышто тунеммыш годымак налын.
Г.Кожевникова
Фотом «Атлантида» СПуО-н соцкылысе лаштыкше гыч налме.
