Кодшо кечылаште Москваште «Российысе калык-влак» всероссийский форум кышкарыште «Гордость нации-2021» кокымшо всероссийский мер премийын лауреатше-влакым палемденыт. Сеҥыше-влак коклаште Марий Эл гыч МарНИИЯЛИИ-н пашаеҥже Андрей Чемышев лийын.
Ме тудым Интернет тӱняште марий йылмым шарыше сай специалист семын палена. Но тудо эше моло финн-угор-влакланат тыгак шке йылмыштым шараш полша.
Премийын лауреатше-влакым палемден саламлыме годым Калык паша шотышто федерал агентстве вуйлатыше Игорь Баринов палемден: «Калыкле тӱвыра автономий-влак деч еҥ-влак кажныже шке калыкшын этнический ойыртемжым, чекшым, тӱвыражым арален кодаш виктаралтше паша лектышым вучат. Ты але вес организацийым Юстиций министерствыште регистрироватлыме гына – тиде шагал. Тӱҥжӧ да нелыракше еҥ-влакым иктыш ушаш, шке шонымашым илышыш шыҥдарыме кумыл дене нуным авалтен мошташ, нине еҥ-влак лач тиде сомылым шуктат.»
Кажне сеҥышылан статуэткым, дипломым да шарнымашан пӧлекым кучыктеныт. Премий шым номнацийыште пуалтын, латик лауреатым палемденыт. Андрей Чемышев «Шочмо йылмым аралымашке да вияҥдымашке надырым пыштымылан» номинацийыште 1-ше верым налын. Ты наградылан тудым Российысе марий-влакын калыкле-тӱвыра автономийышт темлен. Андрей Валерьевич шкежат ты организацийын координаторжылан шотлалтеш. Премийым налшыла, тудо церемонийыш мийыше калыкым марла да рушла саламлен.
Ончыктен кодыман: ты премий Калык паша шотышто федерал агентстве ден РФ Президент пеленсе Калык паша шотышто советын полшымышт дене ойыралтеш. Тений тушко элнан 85 регионжо гыч 912 темлымаш пурен.
С.Носова
