Юрий Зайцев, Юрий Афонин да Сергей Казанков «Звениговский» агрохолдингыште вашлиймаште аграрный отрасльым вияҥдыме нерген мутланеныт.
Марий Эл вуйлатышын пашажым жаплан шуктышо Юрий Зайцев 9 июньышто агрохолдингын предприятийлашкыже миен. Тушто уна-шамычым шокшын вашлийыныт. Нунын коклаште Кугыжаныш Думын депутатше, КПРФ ЦК-ан икымше алмаштышыже Юрий Афонин, республикын ялозанлык да продовольствий министрже Андрей Кондратенко лийыныт.
Республик вуйлатышын пашажым жаплан шуктышо Шолэҥер поселкышто «Звениговскийын» производствыжын куатшым ончен савырнен. Тудо шыл, колбаса, консервым ыштыше цехлаште лийын. А мороженыйым ямдылымаште эсогыл ты лачка сийым тамлен ончен.
Тиде СПК-н председательже Иван Казанков Юрий Зайцевлан палдарен: предприятийыште суткаште 50-60 тӱжем банке консервым ыштат, 130 утла тӱрлӧ колбасам, 160 тӱрлӧ полуфабрикатым ямдылат.
Тыгак республик вуйлатышын пашажым жаплан шуктышо Морко районысо Эҥерсола ялыште 3600 вуй ушкаллан чоҥалтше комплексыште, Кугу Шале ялысе фермыште да «Звениговский» шыл комбинатыште лийын. Иван Казанковын ойлымыж почеш, ончыкыжым Эҥерсола комплексыште 30 паша вер лиеш. Кызыт тушто 15 еҥ тырша.
– Мый пеҥгыде да кугу предприятийым ужым. Тудо мылам моткоч келшыш. Тушто жаплан келшыше у технологий ден оборудований кучылталтыт. Тыгай производитель-влаклан полшыман. Поснак санкцийым увертарыме условийыште, – каласен Юрий Зайцев.
Юрий Афонин «Звениговский» агрохолдинг ден моло предприятий-влакын Российын экономикышкыже кугу надырым пыштымыштым палемден. Кызыт санкций жапыште тӱрлӧ партий ден кучем орган-влаклан ушнаш да Российым у кӱкшытыш нӧлташ кӱлеш манын ойлен.
– Кугыжаныш Думышто выступатлымыж годым КПРФ-ын лидерже Геннадий Зюгановын «Звениговскийым» ик эн лектышан производство семын пример шотеш кондымыжым ик гана веле огыл колында, очыни. Ме Сергей Казанков дене коммунистический партийын еҥже улына. Тудо оппозиционный, но пайдале (конструктивный). Ме «Элым кризис гыч лукмо шотышто варалан кодаш лийдыме 20 мере» программе почеш пашам ыштена. Кӧ элым вияҥдышаш верч тырша, чылаштлан полшаш ямде улына. Мемнан командына пеҥгыде. Тудо тиде мотор республикыште илыше-влакын илышыштымат саемдышаш шотышто кӱлешан да пӱсӧ йодыш-влакым решатлаш полшен кертеш. Кызыт икте-весылан эҥерташ ваш-ваш вачым шындыман. Молан манаш гын, Российын сеҥымашыже кредалмаш пасулаште веле огыл, тыгак экономике фронтыштат тапталтеш, – каласен Юрий Афонин.
Тыгак кучемын эн ончыч шуктышаш задачыжлан мом шотлымо шотышто шке шонымашыжым Кугыжаныш Думын депутатше Сергей Казанковат ойлен. Тудын шонымыж почеш, тыгай задаче-влак кокла гыч тӱҥжӧ – нужналык дене кучедалмаш. Сандене элыште илыше кажне еҥын сай паша верже ден келшыше пашадарже лийшаш, манын депутат.
– Кок шагат жапыште Юрий Викторовичын «ме Марий Элын экономикыжым нӧлталнена, паша вер-влакым ыштынена» манмыжым колышташ моткоч келшыш. Тиде чын паша корно. Калыкын илышыже пеледалтше, парышыже кушшо манын, кызыт мыланна пашам ыпрля ыштыман. Тунам элна виян лиеш, – ойлен Сергей Казанков.
– Ме ик пашам шуктена, ик элыште илена да мемнам ик шонымаш уша: Российын, тушто илыше-влакын илышыштым саемдымаш. Ме кеч-могай партийыште улына гынат, пырля гына лектышыш шуына. Мемнан чыланнан ик идеологий – элнам йӧратымаш. Тидымак пашаштына тӱҥлан шотлаш тӱҥалына, – каласен вашлиймаш мучаште Юрий Зайцев.
Марий Эл Республикым вуйлатышын организаций да аналитике виктемжын уверже-влак негызеш Л.Камалетдинова ямдылен.
