Юрий Зайцев социально кӱлешан объект-влакым чоҥымо да уэмден олмыктымо пашам шуктымо жапым терген.
14 июньышто Марий Элым вуйлатыше национальный проект ден кугыжаныш программе-влакым илышыш пуртымо кышкарыште объект-влакым чоҥымо, уэмден да капитально олмыктымо пашам ворандарен колтымо шотышто регионысо штабын заседанийжым эртарен.
Регионым вуйлатыше министр-шамычын докладыштым колыштын, застройщик-влак дене объектлаште шукталтше паша нерген мутланен, пӱсӧ йодышлам рашемден.
Чоҥымо паша, архитектур да илыме-коммунал озанлык министр Александр Криворотовын палемдымыж почеш, таче республикыштына «Илыме вер да оласе йырвел», «Демографий», «Тазалык аралтыш» национальный проект, Марий Элым вияҥдыме социально-экономический индивидуальный программе, «Россий Федерацийын гражданже-влаклан налын кертме да йӧнан илыме вер ден коммунал услугым ситарымаш», «Коммунал инфраструктурым уэмдымаш» федеральный кугыжаныш программе-влакым илышыш пуртымо кышкарыште 15 объект чоҥалтеш да уэмден олмыкталтеш.
Кызыт Звенигово оласе Сергушкин водозаборышто вӱдым налме кок тавым, Медведево районысо Куяр посёлкышто вӱдым налме системым, Юрино посёлкышто вӱд пуч ден водозаборым уэмден олмыктат. Йӱшаш вӱдым пуымо объект-влакым тений идалык мучаш марте сдатлышаш улыт.
Тений тыгак «Илыме вер» федеральный программын кышкарыштыже чоҥалтше 5 инфраструктур объект финансироватлалтеш. Ты шотыштак Йошкар-Оласе Киров уремыште Ураев бульвар гыч Шернур тракт марте ливневой канализацийын коллекторжым оптат. Тудо 50 процентлан ямде. Чыла пашам 2024 ий 30 сентябрь йотке ыштен шукташ палемдыме.
Докладым верысе шкевиктем органлам вуйлатыше ден подряд организацийлан представительыштат ыштеныт.
Чыла пашалан окса национальный проект, республикым вияҥдыме социально-экономический индивидуальный программе да Россий Федерацийын кугыжаныш программыже-влак кышкарыште ойыралтеш, сандене объект-шамычым чоҥен да олмыктен шуктымо жапым пудырташ огеш лий, палемден Ю.Зайцев да тургыжланаш таратыше объектлашке шке миен савырнаш сӧрен.
Марий Элым вуйлатышын пресс-службыжын уверже негызеш М.ИВАНОВА ямдылен.
