КУЧЕМЫШТЕ

Медик-влак шкеак ялыш мият

Марий Элым вуйлатышын пашажым жаплан шуктышо Юрий Зайцевын кӱштымыж почеш, республикыштына 12 август гыч Тазалык кече-влак эртаралташ тӱҥалыныт.

Врач-специалист-шамычын консультацийыштым да специализироватлыме медицине полышым ик эн ончыч Курыкмарий районышто илыше-влак налыт.

11 августышто Ю.Зайцев район администрацийлам вуйлатыше ден медицине организацийлан тӱҥ врачше-шамыч дене кӱлешан социальный проектым илышыш пуртымо йодыш-влакым каҥашен.

«Поснак тора кундемлаште илыше-влак медицине полышым налме, тыгак шымлымашым эртыме шотышто кугу нелылыкыш логалмыштлан чӱчкыдын вуйым шийыт. Калык тазалыкыштыже палдырныше ситыдымашым умыла, но илыме кумдыкыштыжо специалистын приёмышкыжо логалын огеш керт. Мый тиде йодышым рашемдаш шонен пыштышым. Мыняр умылем, тыгай шотан мероприятий эше эртаралтын огыл. Сандене чумыр пашам икмыняр йыжыҥлан шеледена. Лишыл кечылаште I йыжыҥым илышыш пуртымо годым иктешлымашым ыштена. Чылажат сайын кая манын ӱшанем. Калыкын кумылжо уло, сандене йодмашат лиеш», – палемден Ю.Зайцев.

Правительстве председательын алмаштышыже Ольга Фёдорован увертарымыж почеш, «Таза Республик» проектым илышыш пурташлан ямдылалтме кугу пашам шуктымо, молан манаш гын Тазалык кече-влак поснак ялысе калыклан кӱлеш лийыт.

«Медицине кадрын ситыдымыже – тазалык аралтыш системын ик эн неле йодышыжо. Таче кечылан Тазалык аралтыш министерствын ведомствыштыжо улшо медицине организацийлаште 2061 врач пашам ышта. Тиде чот республикыштына врач-шамычым 64,7 процентлан комплектоватлыме нерген ойла. Ме кадр ситыдымым иземдыме шотышто  тӱрлӧ пашам шуктена гынат, нелылык эше уло. Сандене тыгай акций моткочак жапыштыже эртаралтеш», – манын тудо.

I йыжыҥыште Тазалык кече-влак республикнан чыла районыштыжо 7 сентябрь марте эртат. Йошкар-Олаште тудым кок площадкыште: Республиканский курчак театр воктене да Тӱвыра да каныме рӱдӧ паркыште – каныш кече акций форматыште организоватлат, ешарен О.Федорова.

Тазалык аралтыш министрын алмаштышыже Юлиана Зейтулаева могай шымлымаш ден тазаҥдыме мероприятий-влакым эртараш палемдыме нерген радамын каласкален.

«Лачшымак кӧмытын кӱлмыштым умылаш манын, муниципалитетлаште тӱрлӧ специалист-влак пашам ышташ тӱҥалыт. Районлашке эн ончычак тугай врач-шамычым колтена, могайже тушто уке. Нуно хронический черан пациент-влаклан консультацийым эртарат, ешартыш диагностический процедурлан да эмлалтме мероприятийлан тӱнен илыше-шамычын тазалыкыштым тергат, тыгодым республикысе медицине тӧнежлашкат колтат. Кокымшо тат – тиде, мутат уке, диспансеризаций, вет черым эмлаш огыл, а черланыме деч аралалташ куштылгырак. Диспансеризаций черланен кертмым да черым вияҥаш тӱҥалме йыжыҥыште рашемдымашке виктаралтын. Тыгак у коронавирус инфекций да грипп деч вакцинаций эртаралтеш», – палдарен Ю.Зейтулаева.

Ю.Зайцев ямдылалтме пашам сай велым аклен да проектым илышыш грамотно пурташ кӱлмым палемден.

«Тиде пашам сайын шукташ йодам. Элнан ик эн ончылно шогышо задачыже – нацийын тазалыкше. Чаманен палемдаш логалеш, калык чыла вереат шагалемын толеш, мемнан республикыште веле огыл. Совещанийыште видеокыл режимыште мемнан дене тӱҥ врач-шамыч улыт, мый нунымат колышташ ямде улам.

Тиде уда динамикым, кунам айдеме колымо чот аза шочмо чот дечат кугу, мыланна чылалан пырля чарен шогалташ кӱлеш. Амал-влак кокла гыч иктыже – медицине пашаеҥ-шамычын ситыдымышт. Но тӱҥ амал – айдемын кузе тергалташ да шымлалташ, тиде але вес черым кузе эмлаш лийме шотышто умылыдымашыже», – манын Ю.Зайцев.

Республикым вуйлатышын пашажым жаплан шуктышо муниципальный образований-влакын администрацийлаштым вуйлатыше-шамычын докладыштым колыштын, тӱҥ врач-влак дене мутланен, Тазалык кече-влакым лийме семын пайдалын эртараш манын, калыкым кумдан палдараш кӱштен.

 Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

 

Опубликовать в Одноклассники

Добавить комментарий