Самырык ешыште марий йылмым арален кодымо да пойдарыме йодышлан «Йочам чыла могырым вияҥдыме «Икшывылан- марий йылмым» проект пӧлеклалтын.
Ты проект йоча кутыраш тӱҥалже да вияҥже, йырым-йырысе тӱня дене палыме лийже, тыгыде моторикыже, шочмо марий йылме дене шонымашыже вияҥже манын ышталтын. Тидлан курыкмарла ден олыкмарла дидактический модыш набор-влакым ышташ шонат. Модмо картычке-влакын южо ужашыштым кучен ончаш да йоча фольклорын аудиозаписьшым QR-код гоч колышташ йӧн лиеш.
Кызыт проектын участникше-влак волонтёр-влак дене пырля олыкмарий ден курыкмарий, эрвелмарий-влакын тӱшкан илыме верлаштышт марий йоча фольклор теме дене этнографий материалым погат да шымлат. Тачысе кечылан 10 утла марий илемлаште лийыныт, 30 утла еҥым йодыштыныт. Шымлымашын лектышыжым дидактический модыш картычке-влакым ямдылыме годым кучылташ тӱҥалыт, тыгак проектыш ушнышо-влакын шанче статьяштышт да докладыштышт ончыктат.
Ушештарена, проект Росмолодёжьын грант полышыжлан кӧра илышыш шыҥдаралтеш.
Фотом Молодёжный Совет АФУН РФ тӱшкан воткыл лаштыкше гыч налме.
