ОБРАЗОВАНИЙ

Самырыклан — полыш

Кодшо ий мучаште Юл кундем кугыжаныш технологический университетын студенткыже Юлия  Полевщикова Россий Президентын грантшым сеҥен налын ыле.

Российыште 2018 ий гыч «Наука» национальный проект илышыш шыҥдаралтеш. Тудын тӱҥ шонымашыже — наукым вияҥден колтымаште тӱнямбалсе эн сайын вияҥше вич эл коклаш логалаш. Тудын кышкарыштак самырык шымлызе-шамычлан грант полышым пуат. Тидыже кугыжаныш кӱкшытыштак ышталтеш, молан манаш гын регион ден научный учреждений-влакын шке оксашт уке.

Лач тыгай полышым ПГТУ пеленысе Чодыра пашам ӱшанлын виктарыме да чодырам тора гычак шымлыме шотышто рӱдержын вӱдышӧ шанчыеҥже Юлия Полевщиковат налын. Тудо аэрокосмический съемкылан эҥертен, климатын вашталт толмыжлан кӧра чодыран локтылалтмыжым але мӧҥгешла саем толмыжым эскера. Самырык ученый шке пашаштыже Марий Элын Пӱртӱс поянлык, экологий да йырым-йырысе средам аралыме шотышто министерствыже, верласе лесничестве, тыгак Татарстан ден Чуваш республикласе, Киров областьысе чодыра отрасль дене кылдалтше предприятий-влак дене пеҥгыде кылым куча. Партнёр-шамычлан тудо чодыра фонд, йӱлымӧ кумдык, пушеҥгым руымо, мардеж дене йӧралтме да моло шотыштат чын уверым пуэн кертеш. Тудо 38 научный статьян да  ик монографийын авторжо.  

С.НОСОВА

Опубликовать в Одноклассники

Добавить комментарий