Марий Эл Образований да науко министерстве республикысе вуз-влак, тыгак Бауман лицейысе «Технопарк», Йошкар-Оласе технологий колледж, Марий радиомеханический техникум дене пырля школышто тунемше-влаклан «Калейдоскоп открытий» шанче-тӱвыра шуматкечым эртара.
Черетан тыгай мероприятий ты гана Волжский, Медведево, Морко, Юрино да Йошкар-Оласе общеобразовательный организацийлаште шинчымашым погышо ӱдыр-рвезе-шамычлан лийын. Нуным «ЗПП» АО, «Технотех» ООО дене палдареныт, тыгак «Окса: кушеч нуно лектын, кузе пашам ышта?», «Цифр паша да права» «Сетьыште финанс лӱдыкшыдымылык» лекций-влак лийыныт. Тидын деч посна общий экономике, маркетинг дене мастер-класс-шамычым ончыктеныт.
Марий кугыжаныш университетыште эртыше ужашыштыже республикын образований да науко министрын алмаштышыже Валентина Гаврилова лийын. Тудо палемден: «Тыгай мероприятий Марий Элыштына поро йӱлаш савырна. Эн куандарышыже – тудо тунемше ден туныктышо-влаклан оҥай».
Черетан мероприятий 18 мартыште лиеш.
Фотом Марий Эл Образований да науко министерстве гыч налме
