Марий Элыште йоча-влакын ача-ава улмо ӱмбач тулыкеш кодмо случайышт палынак шагалемын толеш.
Регионын правительствыштыже Юрий Зайцевын вуйлатымыж почеш йоча-влакым ача-ава улмо ӱмбач тулыкеш кодмо деч аралыме йодыш дене заседаний эртен.
Паша да социальный аралымаш министрын пашажым жаплан шуктышо Эдуард Загрутдиновын палемдымыж почеш, социально-реабилитационный рӱдерлашке вераҥдыме ийготыш шудымо-влакын чотышт изем толеш: 2021 ийыште тиде показатель 23,5 процент лийын гын, 2024 ийыште – 9 процент гына. Полиций пашаеҥ-шамычын актлашт дене келшышын, тыгай шотан тӧнежлашке логалше йоча-влакынат чотышт 1,5 пачаш иземын.
Ача-ава улмо ӱмбач тулыкеш кодмо случай – неле йодыш. Тудо йоча-шамыч дене веле огыл, а тичмаш обществе дене кылдалтын. Кугыжанышын политикыже шочмо ешым арален кодымашке виктаралтын, молан манаш гын кажне йоча ешыште илаш праван. Марий Эл тиде йодыш дене кылдалтше пашам лачымын шуктен толеш: сайынжак огыл илыше еш-влакым жапыштыже рашемдышашлан да йочам тулыкеш кодмо деч арален кодышашлан ведомство-шамыч коклаште пеҥгыде кылым ыштен.
Ведомство-влакын пашам пырля ыштымышт дене учёт гыч 268 ешым кораҥдыме, ты чот гыч 117 ешыште сӱрет палынак саемын.
Эдуард Загрутдинов Марий Элым вуйлатыше Юрий Зайцевым тыгак специальный военный операцийыште участвоватлыше сарзе-влакын ешыштлан полшымо паша дене палдарен. Вате-шамычлан комплексный психологический полыш, «Социальный няне» услуго темдадтеш. Мут толмашеш, пытартышыж дене тачысе кечылан 132 еш пайдаланен.
Профилактике дене кылдалтше йодыш-влак Марий Эл прокуратур пеленысе ведомство-шамыч кокласе пашаче группылаште, правительстве пеленысе ийготыш шудымо-влакын пашашт да нунын праваштым аралыме шотышто комиссийлаште, регионышто правопорядкым эскерыме шотышто координационный совещанийлаште, «йыргешке ӱстеллаште» да форумлаште каҥашалтыт.
Ача-ава погынымаш, оперативно-профилактический мероприятий да «Аралымаш», «Тунемаш каяш полшо», «Подростко – йӱд», «Йоча пагытын лӱдыкшыдымылыкшӧ» акций-влак эртаралтыт.
Ача-ава улмо ӱмбач тулыкеш кодмо случай-влакым шагалемдыме да нелылыкыш логалше еш-шамычлан полшымо шот дене ведомство-влак кокласе кылым саемдыме пашам умбакыже шуяш кӱлеш, заседанийым иктешлымыж годым палемден Юрий Зайцев.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
