Марий Элым вуйлатыше Юрий Зайцев Курыкмарий районышто Кугу Ачамланде сарын ветеранже, тылыште тыршыше Никодим Петрович Пронин дене вашлийын.
«Мыланем тиде кугу событий. Никодим Петрович ӱмыржӧ мучко Марий Элыште тыршен, шке вийжым республикнан да Шочмо элнан сай илышышт верч пуэн. Куштылго огыл корным эртен, сандене таче ме ветеранна-влаклан полшышаш да тауштышаш улына», – палемден Юрий Зайцев.
Пагалыме ветеран Виловат ял шотан илемысе Кожерлӓ ялыште шочын. Сар ийлаште подростко лийын, кугыеҥ-влак дене пырля чодырам руэн. Шужен колымо деч пасушто пелешӱйшӧ пареҥгым поген кочкын.
Кызыт Никодим Петровичын кок эргыже, ныл уныкаже да уныкажын ик шочшыжо улыт. Ветеран чыла сурт сомылкам шке шукта, тазалыкшым эскера – олаште тӱҥ шотышто йолын коштеш, пеледыш клумбым эскера.
Юрий Зайцев Никодим Петрович дене Кугурак тукымын вашмутланыме рӱдерыштыже вашлийын. Илалше еҥ-влак тышке у шинчымашым налаш да ваш мутланаш коштыт. Нуно интернетыш лекташ лийме уна компьютер, теннис ӱстембал, изирак библиотеке, конференц-зал, ӱстембал модыш, кугу телевизор, фортепиано, маскироватлыше сетьым пидме станок, ургымо машина дене пайдаланат, оксам чын кучылташ тунемыт.
Рӱдерыште эртыше ий декабрь гыч тачысе кече марте 93 мероприятий эртен, тушко 2 тӱжем наре еҥ ушнен. Тыште поснак кугу тӱткышым СВО-н участникше-шамычлан ойырат – волонтёр-влак маскироватлыше сетьлам пидыт. Икманаш, рӱдер Курыкмарий районысо илалше-еҥ-влакын иктыш чумыргымо верышт лийын.
Кугурак тукым дене вашлийын мутланыме деч вара Юрий Зайцев ден Козьмодемьянскын мэрже Михаил Козлов Чап обелиск воктеке пеледышым пыштеныт. Шарныктышым верысе калыкын тӱҥалтышыжлан полшымо программе почеш капитально олмыктымо. Тидлан 2023 ийыште 3,8 миллион наре теҥгем ойырымо. Кызыт тыште – металл стеле, прожектор, видеокамер, Кугу Ачамланде сарыште вуйым пыштыше-влакын фамилийыштым возыман мемориал. Тыгак Курымашлык туллан газ пучым шупшмо.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
