Марий Элыштына могай калык ила, нунын шочмо йылмышт кузе йоҥга, могай вургемым чият, могай йӱлашт уло – палынеда гын, «Lingva-территорий» фестивальыш мийыза!
Республик кӱкшытан тиде мероприятийым ынде лу ий утла Шочмо йылмын тӱнямбал кечынже але тудын вашеш республикысе Марий тӱвыра рӱдер Марий кугыжаныш университет дене пырля эртара да йылмызе, преподаватель, студент-влакым да шочмо тӱвырам йӧратыше моло еҥ-шамычым иквереш уша.
Теният ты кечын вузын Калыкле тӱвыра да тӱвыра-влак кокласе институтшын фойештыже пайрем шӱлыш шижалте. Но тиде шӱлыш тыглай пайремын гай огыл, ойыртемалтшак. Кажне гана тушко мийыме да погынышо-влакым эскерыме годым, паледа, мом эн чот куанен ончем? Шочмо калыкыштын вургемыштым чиен, сценыш лектын шогалше-влакым. Марий, татар, руш, чуваш, англичан, француз, немыч, венгр, узбек, араб, испан, грузин… Чылаштым возенат от пытаре! Нуно, нылле утла эл гыч толшо-влак, чыланат таче Марий кугыжаныш университетыштына шинчымашым погат. Кузе нунын шинчашт йӱла! А кузе куанен шочмо йылмышт дене саламлыме шомакым ойлат! Но чоным эн чот тарватышыже – сцене гыч волен, залыште шинчыше калык кокла гыч вуйым кӱшкӧ нӧлтен, кугешнен-куанен, моторын да тыгодымак пеҥгыдын ошкыл колтымышт! Могай тиде вий – умылтарашат ок лий… Лач тиде нимучашдыме кугу вий-куат, шочмо йылмын кӱлешлыкше нерген участник-влаклан Марий Эл Кугыжаныш Погынын председательже, Россий АФУН председательын алмаштышыже Михаил Васютин, Марий Эл тӱвыра, савыкташ да калык-влакын пашашт шотышто министрын алмаштышыже Игорь Садовин да Кугыжаныш Погын председательын икымше алмаштышыже, Россий калык-влак ассамблейын регионысо пӧлкажын председательже Лариса Яковлева ойленыт.
Тидын деч вара республикысе марий, татар, удмурт да чуваш тӱвыра-влакын рӱдерышт сценыште уна-влакым вашлийме йӱлаштым ончыктеныт. Умбакыже погынышо-влаклан марий да руш йылмыла дене почмо занятий-влак лийыныт. Кумдан палыме компьютер лингвистна Андрей Чемышев РУВИКИ интернет-энциклопедий да тудын ойыртемже дене палдарен, а Марий кугыжаныш университетын преподавательже Татьяна Лановаян презентацийже руш йылмын мут поянлыкшылан пӧлеклалтын.
Ты кечын фестивальыш толшо кажне еҥ руш, марий, татар, чуваш, удмурт, англичан, таджик, француз, венгр, араб, немыч, корей, испан, узбек, грузин, коми, хинди йылмыла дене интерактивный занятийлаште лийын кертын.
Г.Кожевникова
М.Скобелевын фотожо
