Кодшо шуматкечын Медведево ипподромышто Сабантуй эртен.
Ага пашам иктешлыше да мландылан тауштымо пайремым республикыште 37-ше гана тӱшкан палемденыт. Тудын гоч татар калыкын могай ойыртемалтше койыш-шоктышан улмыжым тичмашын пален налаш лиеш, санденак Сабантуй Йошкар-Олалан веле огыл, уло республиклан кугу событий манашат лиеш. Пытартыш ийлаште тудо Медведево ипподромышто эрта, амал деч посна огыл, вет пайремын ик ойыртемже – имнешке-влакын таҥасымашышт. Тений тушко Марий Эл, Татарстан, Чуваший республикла гыч 30 наре участник ушнен. Тыгак имне спорт школын тунемшыже-влак шкеныштым ончыктеныт. Таҥасымаш эрденак тӱҥалын, трибунышто калык шуко погынен.
Татар калык тӱвыра, йӱла, вургем, кочкыш дене палдарыше кудо-влак шке капкаштым почыныт. Тыгай кудыжым Марий Турек, Параньга, Морко, Медведево, тыгак Татарстан Республик гыч Бугульма район-влак конденыт. Кажныштыже уна-влакым калыкын йӱла почеш вашлийын-ужатен да сийлен колтеныт. Кидпаша ярмиҥга пашам ыштен. Вургемым ямдылыше мастар-шамыч шке сатуштым ончыктеныт, мастер-класс-влакым эртареныт.
Тенийысе Сабантуй Россий президентын увертарыме Россий калык-влакын икоян улмо идалыклан пӧлеклалтын. Лач тыгай тӱшкан эртарыме калык пайрем-влак икте-весым сайынрак пален налаш, умылаш, шкем кугу элын ужашыже семын шижаш полшат. Пырля йӱлам ворандарен, икте-весе деке пагалымаш пеҥгыдемеш.
Игече юалгырак лийын гынат, пайрем кумыл чыла вере шижалтын. Тудо тӱҥ сценыште республикысе Татар тӱвыра рӱдерын усталык коллективше-влакын представленийышт дене тӱҥалын. Регион вуйлатыше Юрий Зайцевын саламлымашыжым Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов лудын пуэн: «Акрет жап гыч толшо паша, сай лектыш да келшымаш пайрем уло республикысе калык-влакын тӱвыра поянлыкышкышт савырнен», – палемден тудо. Россий Кугыжаныш Думын депутатше, Татар-влакын федеральный калыкле-тӱвыра автономийыштын еҥже Ильдар Гильмутдинов, Марий Эл Кугыжаныш Погынын депутатше, Оньыжа Эдуард Александров, Татарстанын Кугыжаныш Советшын Экономике шотышто комитетшым вуйлатыше Рягат Хусаинов да молат саламленыт.
Оньыжа калык-влак кокласе кылым пеҥгыдемдымашке надырым пыштымыштлан Ӱштӧ дене да кореш кучедалмаш федерацийын регионысо пӧлкажын судьяже-влак Рамиль Бахтияровлан, Ильнур Гариповлан да республикысе Татар рӱдерын режиссёржо Ляйсан Гариповалан Кугыжаныш Погынын Тауштымашыжым кучыктен.
Сабантуйын ик ойыртемже – тӱрлӧ калык модыш дене модмаш. Но эн шуко еҥым спорт алан пога. Таклан огыл татар калыкын физический воспитаний дене кылдалтше йӱлам шымлыше Н.А.Семёнов Сабантуйым акрет грек-влакын олимп модмашышт дене таҥастарен. Тӱрлӧ таҥасымашке спортсмен веле огыл, шкем тергаш шонышо-шамычат ушнен кертыныт. А теве кореш кучедалмашке кап нелыт шот дене 10 категорийыште таҥасеныт. Мо оҥайже – ӱдыр-влакат лийыныт. Мутлан, 16 ияш-влак коклаште 60 килограмм марте нелытан коклаште Рудия Габдуллина да 60 деч утларак нелытан коклаште Анна Смирнова икымше лийыныт. Сабантуйын абсолютный чемпионжо лӱмым спортсмен да тренер Мунир Галямов сеҥен налын. А эн самырык батыр семын Рамзан Хамзиным палемденыт.
«Сабантуй» мут кок ужаш гыч шога: «сабан» – плуг, «туй» – пайрем.
Светлана Носова
Михаил Скобелевын фотожо.
