Кечышот ден калык пале: 4-11 август
14 август – Мӱкш илян.
Марий йӱлан чинче тушыжо:
«Ик мӧрым налаш, кум мӧрым кодаш, изиракшым погаш, кугуракшым кодаш, ик пӱкшым кӱрлын налаш, кум пӱкшым кодаш, шым шудо касалыкым солалташ, ик касалыкшым кодаш, ик кошкышо пушеҥгым руалын, олмешыже кум пушеҥгым шынден кодаш, ший вӱдлан таум каласен, вошткойшо южлан таум ойлен, Ош Кечылан вуйым савен, илаш кумылым, вийым пу, Шочынава!»
Сӱан деч вара «Оръеҥ мелна» пайремыш толшо-влакын сугыньлымо мурышт:
«Сай илыза, сайын кодса,
Йӱд омыдам сай малыза.
Мемнан вес гана толмешке,
Ӱстел йыр куржталше шочшан лийза.
Вӱргеньым пыштем гын, рӱдаҥеш,
Кагазым пыштем гын, шулалеш.
Лучо пыштем ший оксам,
Ший гай волгалт илыза».
В.Т.Михайловын «Калык ойпого – калык чон поянлык» книгаж гыч налме, 2017 ий.
Черке йӱла почеш:
13 август – Петроградысе священномученик Вениаминын кечыже.
14 август – Господьын Кугун Пагалыме Ылыжтарыше Ыресше лӱмеш пайрем. Икымше (Мӱй) Спас. Успений пӱтӧ тӱҥалтыш.
16 август – Преподобный Антоний Римлянинын, Новгородысо чудотворецын, кечыже.
Кукшо игече годым йӱрым кондымо нерген молитва:
«Чылам кучен ашныше Господь Юмына, Тый декет поро кумылан улмыжлан Фесвитян Илиям колыштынат да мландышке йӱрым жапыште колташ чаренат, тыгак тудын молитваж дене саскам шочыктышо йӱрым мландылан пуэнат. Чылам кучен Ашныше, Тыйын Шке порылыкет деч сӧрвален йодына, Тыйын йодшет-влаклан ласка йӱрым пу; да мемнан сулыкнам ончыде, Шке йӱретым кӱлешан да йодмо верыш колто; Тыйын нужна еҥет да йочат-влак верч, вольык да чыла моло верч мландын тӱсшым куандаре; кӱлеш жапыште кочкышым пуэт манын, нуно тыланет ӱшанат. Господь, Тый мемнан Юмына улат, эре чамане да утаре, да тыланет чап мурым мурена, Ачалан, Эргылан да Святой Шӱлышлан, кызытат, керек-кунамат, курым-курым мучкак. Аминь.»
«Марла молитва-влак» книга гыч налме,2005 ий
Шарнаш кодшо ой:
Йылме дене нӧлпӧ пӱгымат тӱҥдаш лиеш.
Калык шинчавӱд арам огеш його.
Кеҥеж – илыме курымын кумылзакше.
Кечывал омо – чер, кас омо – каныш.
Кид-йол лийже, паша лектеш.
Кидысе турням колтен, купышто улшым от кучо.
Колыштат гын – шомак, от колышт гын – йомак.
Корным ончыктен кайыше – эре ончылно.
Ӱмырым илен эртарышын каҥашыже:
«Илыш моткоч кӱчык, сандене правилымат пудыртен кертыда, шупшалалтса эркынрак, йӧратыза чотрак, чон канымеш воштылза да нигунам нимо нерген ида чамане».
А.Е.Китиковын «Марий калыкмут мутер» книгаж гыч налме,1990 ий.
С.Носова ямдылен
Снимкыште: кеҥежым — ялыште.
Авторын фотожо
