Шошо шумеке, тиде пайремым изижге-кугужге йӧратен вуча. Лач Кугече годым мелна кышылым, туарам, шӱраш ден комбо шылан тыгыде когыльым, шоҥешталтше пурам ямдылат, а эн ончыл верым, мутат уке, шоган шӱмеш шолтымо чевер мунылан ойырат. Тидын денак, очыни, ты пайрем марий калыкын ик эн вучымо пайремжылан шотлалтеш. Адакшым ты жаплан чыла чонан помыжалтеш, пӱртӱс ылыжеш. Кугечылан шукынжо поснак, эрден-эрак кынелын, кече лекмым ончаш вашкат.
Йолташна-влак Кугече пайремлан кузе ямдылалтыт? Ӱстембаке могай чесым погат?
Светлана Сандакова, Марий Элын калык артистше:
– Тиде гана Кугечылан ачам ден авам деке ялыш каена. Пайрем деч ончыч пӧрт кӧргым эрыктена, мушкедена. Мончаш пурен лектына да пайрем кечын у вургемым чиена. А тидыжым у вургемым налаш йӧн лийже да таза лийын чияш манын ыштат. Авамак эше тыге ойлен коден ыле. Пайрем ӱстембаке мелнам, когыльым, тӱрлӧ салатым погена, шашлыкым лӱмынак ямдылена. А эн тӱҥ верыште, мутат уке, чевер муно лиеш.
Аида Макова, Тӱвыра, савыктыш да калык-влакын пашашт шотышто министерствын печать да массовый коммуникаций отдел вуйлатыше:
– Кугече пайремлан сайын ямдылалтман: пӧртым эрыктыман, чыла вере пуракым ӱштман, кӱмыж-совлам ончен лекман, ударакшым да тоштыракшым луктын кудалтыман. Тиде волгыдо пайремлан мелнам кӱэштына, когыльым ыштена, муным чиялтена, тыгак чыве шылым жаритлена, окрошкым ыштена. А вара поро уна-шамычым чон почын вашлийына.
Маргарита Тойшева, Медведево районысо Семёновко амбулаторийын врач-педиатрже:
– Волгыдо Кугече пайремлан ме еш дене ончылгочак ямдылалташ тӱҥалына: сурт кӧргым эрыктена, окнам мушкына. Шуматкечын кастене мончаш пурена, могай-гынат у вургемым чиена. Кастене пурам шолтена, когыльо кӧргым (шӱраш дене комбо шылым шолтена) ямдылена да туддене тӱрлеман кугече когыльым ыштена. Пареҥге да торык денат шергом когыльым шолтена. Муным шоган шӱм дене чиялтена. Эрдене кынелын, шӱрашан мелнам, эгерчым, туарам коҥгаш кӱктен луктына. Ӱстембаке тичмаш киндым, ямдылыме чеснам, комбо шыл дене шолтымо шӱрым, чиялтыме муным радам дене шындена. Туара ӱмбак ший оксам пыштена. Пелашем сортам чӱктен, Кугече Юмылан кумалме мутым пелешта. Кумалын пытарымеке, чиялтыме муным юмо шӧрлыкыш пышта да муно гай чумыраш тутло илышым пужо манын йодеш. Вара уло ешна дене ӱстел йыр шинчына, Кугече Юмо лӱмеш ямдылыме тутло чесым кочкына. Ондак йочана-влаклан, а кызыт уныка-влаклан лӱҥгалтышым ямдылена, шкежат лӱҥгалтена. Тыгак шкенан деке кум-кумышканам ӱжына, нуно Пермь кундем гыч руш улыт гынат, марий кочкышым пеш йӧратат.
А.БАЙКОВА.
М.Скобелевын фотожо
