Марий кумалтышын чинче тушыжо:
«Ош Кугу Юмо-Пӱрышӧ! Ме шикш йымал калык улына, марий-влаклан таза тыныслык илышым йодына. Чыла тыйын кидыштет: шочшынан волгыдо кечыжат, кочшаш-йӱшаш кинде-шинчалжат, возын каныме вержат. Ме пӱйрышӧ чыла сомыл пашанам ыштена: неле салтак корныштат, кугыжан казна пашаштат таза-эсен кондештаре. Чумыр могырнам таза=эсен кодаш йӧным пу. Еҥ тушманлан ит кудалте. Ӱй корнын каеныт гын, мӱй корнын пӧртылаш, Кугу Юмо, саклен да арален кондышт. Поро, ӱшанле йолташынат, ушан озан кумылыштымат меманн чонна велке савыре».
«Марий сугынь» книга гыч налме, 2005 ий.
Черке йӱла почеш:
3 март-19 апрель – Кугече деч ончыч пӱтым кучымо пагыт. Черке йӱла почеш, ты пагытыште чоткыдо пӱтым кучымаш, Юмылан шуко кумалмаш, ӧпкем кудалтымаш айдемым Юмо деке лишкырак ышта.
5 март – преподобный Агафон Печерскийым шарныме кече.
8 март – Москвасе поро пиалан Матронушка-аванан мощыжым мумо кече.
9 март – Христос ончыч Толшо да Тудым Тынеш пуртышо пеш чапле Иоанн пророкын вуйгоҥгыражым икымше да кокымшо гана мумаш.
Йоча-влак верч Утарыше Христослан аван кокымшо молитваж гыч:
«Икшывемын чын илышыже – Тыйын кӱштыметым шуктен шогымаште, сандене нуным тидлан ӱшандараш мыланем ушым пу: вет Юмо полшымо дене уло кумылым пыштен ыштыме паша тиде илышыште каласен моштыдымо пиалым конда. Тыйын законетым палаш ушыштым волгалтаре! Тек Тыйын чыла вере улметым ӱмырышт мучко шижын шогат! Нунын шӱмышт гыч тӱрлӧ осал койышым кораҥде, закондымылык деке чытыдымашым тарвате, тек илыш корнышт языкдыме, яндар лиеш».
«Марла молитва-влак» книга гыч налме, 2005 ий.
Калык пале:
8 мартыште лум возеш – тений Кугечылан йӱштырак лиеш, кукшо лиеш – Кугечыланат йӱр огеш тол.
Шемгорак ден вараксим толын шуыныт гын, шошо вашке толеш.
Шемгорак ден чаҥа-шамыч кӱшнӧ чоҥештылыт да вара пеш писын мландывак волен шинчыт – лум толшашлан.
Мартыште лийше поран деч вара пасулаште лум иктӧр огыл, а курык чуҥга-влакым ыштен возеш – пакчасаска ден икияш пырче тений сайын шочыт.
Шӱльыкайык эр толеш – вашке леве шошо игечым вучыман.
Ӱмырым илен эртарышын каҥашыже:
Айдемым илыш ок туго гын, тудо пӱрымашыж деч виян.
Еҥ-влак тыланет полшаш тореш лийыт гын, Эйнштейнын ойжым шарналте: «Кӧ мыланем полшен огыл, мый чыланыштлан тауштем: лач нунылан верч чылажат илышыште шке ыштенам».
Малымет шуэш гынат, кажне кечын куд шагат эрдене кынелат гын, кеч-могай шонымашкет шуат.
У эр ӱжарат эше лиеш, у сеҥымашат толеш, сандене кумылет нигунам ынже воло, илаш йӧн садак лектеш.
Лаштыкым Светлана Носова ямдылен
Снимкыште: Йошкар-Олаште – Серафим Саровский лӱмеш черке.
Тудым 2009 ийыште пашаш колтымо. Ӱлыл приделжым кугун орланыше Варвара (ракетный войска-влакым аралыше святойлан шотлалтеш), а кӱшылжым Серафим Саровский лӱмеш освятитлыме. А черкыжым корабль форманым ыштеныт. Тудын вич вуйжо уло: тӱҥжӧ Христосым символизироватла, а моло нылытше – ныл евангелистым.
Ты черке Йошкар-Оласе военный гарнизонынлан шотлалтеш, сандене тыште сарзе-влак дене кылдалтше кечышот пайрем-влаклан эре службым эртарат. Храмын настоятельже Александр Бачурин – сарзе еҥ. 23 февральыште эртарыме мероприятийышке ракетный дивизийын ветеранже-влакым ӱжыныт. Рушарня школын тунемшыже-влак концертым ончыктеныт.
Черке пелен рушарня школ, трапезный, ургымо мастерской улыт.
Светлана Носован фотожо.
