КАЛАСЕ, "МАРИЙ ЭЛ"

Ик кечылан – ик кечымак

Мыланем – 50 ий. Ялыште шочын-кушкынам, ынде 30 ий Йошкар-Олаште илем. Йолташ ватем йоча годым, поснак кеҥеж каникул жапыште, колхозышто пашам ыштыме ик кечылан стажыш утларак кечым шындат манеш. Тыгай уверым икымше гана колам, сандене ӱшанымылат огеш чуч. Да, авам мыйым 11 ияшымак колхоз пашашке луктын. Тылеч вара, кыдалаш школым тунем пытарымешкем, кажне кеҥежым тӱшка озанлыкыште кугыеҥ-влак дене тӧр гаяк пашам ыштенам. Тидлан оксам тӱленыт, а эше шудо ден олымым яра ойыреныт, пырчымат пуэныт…

 Чаманен палемдем, Йошкар-Олаште вузым тунем пытарымем деч вара медицине организацийыш пашаш пурымемлан тӱшка озанлык панкрутыш лекте да петырныш.

Палынем ыле, йолташ ватем чыным ойла мо? Йоча годым колхозышто пашам ыштымым кузе пеҥгыдемдыман? Вет мыланем трудовой книжкам почын огытыл, пашаш лекмым бригадир тетрадьыште гына палемден…

Н.Алексеева

Волжский район

 

Йодышлан Россий Пенсий фондын Марий Элысе пӧлкажын специалистше-влак тыге вашештеныт:

– Колхозышто, совхозышто але тÿшка паян озанлыкыште пашам ыштыме жапым стажыш айдемын 16 ийым темымыж деч вара пуртат.

Южгунам паша кылым 14-15 ияш да тылечат самырык еҥ-влак денат ыштеныт. Айдеме йочаж годым колхозышто вольный манме найм дене пашам ыштен да тидым документ дене пеҥгыдемда гын, тÿшка озанлыкыште тыршыме жапше стажыш пурталтшаш. Тыгак колхозышто пашам ыштыме кечылам лачшымак йочалан возымо але тиде пашалан лачшымак тудлан тÿлымö (окса але, шке манмылада, шудо, олым, пырче дене) гын, 16 ияш деч изирак икшывынат тÿшка озанлыкыште тыршыме жапшым стажыш пуртен кертыт.

Тÿшка озанлык пытен гын, йоча годым колхозышто пашам ыштыме жапым архив гыч налме справке дене пеҥгыдемдаш лиеш. Тыгай документым колхоз верланыме районысо рÿдö архивыште пуат. Тушко лÿмын коштдеат лиеш, молан манаш гын йодмашым МФЦ гоч пуаш йöн уло. Россий Пенсий фондын кундемласе органже-влакат кÿлешан документым погаш полшат.

Йочан кеҥеж каникул годым колхозышто пашам ыштыме ик кечыжым стажыш ик кече семынак пуртат, а утларак кечым огыт шынде.

М.ИВАНОВА

Опубликовать в Одноклассники

Добавить комментарий