Россий Пенсий фондын сайтшым колышташ лиеш маныт. Чынак мо?
Н.Фёдоров
Звенигово район
Йодышлан Россий Пенсий фондын Марий Элысе пӧлкажын пресс-службыштыжо тыге вашештышт:
– Йӱкан ассистент фондын сайтышкыже вераҥдыме чыла материалым йӱкын лудеш. Тыгай йӧным начарын ужшо да сокыр граждан-влаклан кок ий ончычак ыштыме.
Сайтысе текстым колышташлан «АА» менюм почман, фрагментым мышке дене ойырен палемдыман да экранын кӱшыл ужашыштыже верланыше «чӱкташ» кнопкым темдалман. Кӱлеш гын, ассистентын лудмыжым чарен шогалташ але угыч чӱкташ лиеш.
Йӱкан ассистентым начарын ужшо-влаклан палемдалтше сайтын версийышкыже ушымо. Тудо стандарт деч рашлыкше, текстын кугытшо дене ойыртемалтеш. Страницыште шрифтым, тӱсым, фоным да молымат вашталташ лиеш.
Южгунам компьютерыш шындыме браузер але антивирус йӱкан ассистентын пашажым блокироватлен кертыт. Тыге ынже лий манын, нуным чын шындаш, Пенсий фондын сайтышкыже лекше окнам блокироватлаш кӱлеш.
Начарын ужшо-влаклан палемдалтше сайт ден йӱкан ассистент Россий Пенсий фондын кугыжаныш услугыжым «Доступная среда» программым илышыш пуртымо кышкарыште кумдаҥдат.
М.ИВАНОВА
