Тений кеҥежым мемнан элыште футбол дене тӱнямбал чемпионат эртыме годым саркуралым кучылтмо шотышто чот эскераш тӱҥалыт манын колынам. Чынак мо?
М.Никифоров.
Советский район.
Йодышлан Росгвардийын Марий Элысе пӧлкажын пресс-службыштыжо тыге вашештеныт:
— Чынжымак, FIFA-н футбал дене тӱнямбал чемпионатшын эртымыж годым саркуралым кучылтмо шотышто чот эскераш тӱҥалыт. Тиде пагытыште граждан да служебный саркуралым кучылтмо шотыштат ограничительный мерым ыштат. РФ Президентын указше дене келшышын, 25 май гыч 25 июль марте Волгоградыште, Екатеринбургышто, Казаньыште, Калининградыште, Москваште, Нижний Новгородышто, Ростов-на-Донушто, Самарыште, Санкт-Петербургышто, Саранск ден Сочиште граждан да служебный саркурал, тыгак нунылан патрон дене пайдаланаш чарат. Исключений семын уполномоченный орган-влак гына тудым арален да поген налын кертыт.
Тыгай чарак сонарыш коштыктымо пычалланат лиеш. Тиде пагытыште сонарлаш ок лий.
Саркуралым ужалыше кевыт-шамычланат граждан саркуралым да тудлан патроным ужалаш чаралтеш. Йодмым шукташ тореш лийыт гын, саркуралым да боеприпасым поген налыт.
Росгвардийын республикысе пӧлкаже саркурал оза-влаклан тиде пагытыште амал деч посна тудым сейф гыч лукташ огыт темле. Чемпионат эртышашлык регионлаш лектын коштмо годым пелен ни граждан, ни служебный саркурал лийшаш огыл.
С.Носова ямдылен.
