Марий Эл вуйлатыше Юрий Зайцев республикнан эн сай 59 студентше ден аспирантшылан республик вуйлатышын дипломжым кучыктен.
Наградым вузлаште, ссузлаште тунемше студент, аспирантлан пуэныт. Марий Эл вуйлатышын стипендийжым «визытанлан» гына тунемше, республикысе, всероссийский, тӱнямбал олимпиадылаште шкеныштым сайын ончыктышо студент-влак налаш тӱҥалыт. Республик вуйлатышын стипендиатше лияш манын, аспирантын иктаж авторский открытийже лийшаш, шанче статьяже савыкталтшаш, тыгак тудо экспериментла дене кылдалтше пашашке ушнышаш.
Самырык-влакын у шинчымашым налаш, у открытийым ышташ кумылан улмышт элнан экономикыжын отрасльже-шамычлан вияҥаш, ончыко наҥгайыше проектлам илышыш шыҥдараш, Российын ончыкылыкшо волгыдо лиеш манын ӱшаным пуа, палемден Юрий Зайцев.
– Марий Элысе вузлаште тӱрлӧ специалист-влакым ямдылаш кӱлшӧ технике, методике, тунемме базе, сай шанче кадр-влак улыт, – каласен Марий Эл вуйлатыше.
Мероприятий мучаште регионым вуйлатыше уста тунемше-влакым куштымылан педагог ден наставник-шамычлан тауштен.
Марий Эл вуйлатышын пресс службыжын уверже негызеш Лидия ШАБДАРОВА ямдылен
Д.Речкинын фотожо/ Марий Эл вуйлатышын пресс-службыжо
