Патырлык
Геройым шарныктыше экспозиций
18 апрельыште Йошкар-Оласе Т.И.Александрова лӱмеш 11-ше №-ан лицейын тоштерыштыже спецоперацийыште ӱмыр лугыч лийше, Мужество орден дене наградитлалтше (колымыж деч вара) сержант Богдан Бульченком шарныктыше экспозицийым почыныт.
Сержант Б.Бульченколан шарнымаш экспозицийым почмо годым уна-влак ятырак улыт ыле. Мероприятий 2022 ий 18 апрельыште Богданым Мужество орден дене наградитлымылан идалык теммылан келыштаралтын.
Мероприятийыш Богданын аваже Ольга Борисовна кокымшо эргыже Захар дене толын. Ветеран организаций-влакын еҥышт, лицейыште туныктышо, тунемше-шамычат ятырак чумыргеныт.
Мый тиде школын тоштерыштыже икымше гана лийынам, сандене чылажат ӧрыктарыше лийын. Музей поян, тунемше да молыланат пайдале, шкешотан улмыж дене ойыртемалтеш. Пурымаштак ик татлан пуйто Кугу Отечественный сар жапыш логалат. Теве шола велне – командирын землянкыже, вес ужашыште – медсанчасть, медсестра сусыргышым терга… Чыла экспозиций жаплан келыштаралтын.
Ты школын ончычсо директоржо, Социалистический Паша Герой Таисия Александровалан ойырымо верат шинчымашым келгемдаш полшышо ятыр экспонат да материал дене пойдаралтын.
Богданлан ойыралтше стендыште, витриныште рвезын изи годсо, РФ Вооруженный Вийыште служитлыме пагытысе фотографийже-влак улыт. Теве изи рвезе – пианино воктене, а теве вес вере – армийысе йолташыже-влак коклаште.
Сайын тунеммыжланат, мер пашаште чолгалыкым ончыктымыжланат, тӱрлӧ конкурсышто участвоватлымыжланат грамот да диплом дене палемдалтын. Нуныланат верым ойырымо. Тыгак лудмо книгаже, военный да читательский билетлаже, эсогыл кажне кечын мо лиймым возымо дневникшат тыште верым муыныт. Мо ӧрыктарыш, Богданын почеркше моткоч мотор да чатка. Тыштак РФ Миноборонын «Участнику военной операции в Сирии» (2018 ий) медальже ден Мужество орденже койыт.
Гитар денат шоктен, почеламутымат возен
Экспозицийым почмо годым туныктышыжо-шамыч, Богданым шарналтен, шуко оҥай татым каласкалышт. Чыланат тудын порылыкшым, тӱшкаште шкенжым кучен моштымыжым, кӱлеш годым полшаш кумылан улмыжым палемдышт.
– Эргым армийыште шкенжым сай воспитатель семын ончыктен, – ойла аваже. – Тудым срочник салтак-шамыч йӧратеныт. Богдан музыкальный школым тунем лектын. Тидланже, можыч, мыят могай-гынат шӱкалтышым ыштенам. Жапше годым мыят музыкылан кумылан лийынам. Богдан почеламутымат возен. Утларакше илыш нерген шонкалымашан улыт. Мутат уке, пӱртӱс да йӧратымаш темат кугу верым налын. Шуко лудын, вет мемнан мӧҥгыштына шкенан сай библиотекына уло. Эргымын моло рвезе семынак хулиган койышыжат жапын-жапын лектын. Тыгай годым шылтален налат, но поро шинчаончалтышыжым ужын, шыдешкыметшат тыманмеш йомеш.
Тиде шарныктышым ямдылаш полшышо-влаклан пеш кугу тау.
***
Богдан икмыняр локальный сарым эртен, Таджикистаныште, Сирийыште, Украиныште спецоперацийыште икымше кече гычак лийын.
Гаубичный артиллерийский взвод отделенийын командирже спецоперацийыште ӱмыр лугыч лийше Богдан Владимирович Бульченком 2022 ий 9 апрельыште тоеныт.
Владимир Белоусов, «Боевое братство» Всероссийский мер организацийын регионал отделенийжым вуйлатыше:
– Тыгай эргым ончен куштымыланда, Ольга Борисовна, кугу тау. Богдан мемнан организацийыште боевой действийын эн самырык ветеранже ыле. Элнам аралымашке мемнан пашанам шуйышо самырык тукымын ушнымыжо куандара. Чаманаш гына кодеш, пеш ондак илыш гыч каен. 27 ияш Богдан ӱмырешлан стройышто кодеш. Кызыт мемнан задачына – тыгай патырна-шамычым шарнаш, нунын боевой подвигыштым тукым гыч тукымыш ушештарен кодаш. Самырык-влакым военно-патриотизм шӱлышеш воспитатлымаште нуно пример лийын кодыт.
***
9 декабрьыште, Отечествын Геройжо кечын, тиде школышто мемориал оҥам почыныт.
Тоштерын вуйлатышыже Л.Кавиеван палемдымыж почеш, военно-патриотический класслаште эртыше таҥасымаште сеҥыше класслан Геройын кубокшым кучыкташ тӱҥалыт. Тудо куснылшо лиеш.
Е.Эшкинина.
