100 ий да тылечат шуко илыше еҥ-влак дене умбакыже палдарена.
14 мартыште Оршанке посёлкышто илыше Евдокия Прокопьевна Чепайкина 103 ийым темен. Тылын труженикше, пашан ветеранже Шем памаш ялыште шуко йочан ешыште шочын. Изинек «Доброволец» колхозышто пашам ыштен. Сар годым тылыште тыршен, фронтлан киндым да кӱлешан моло продуктым ситарен.
Неле жапым ончыде тунемын, ончыч колхозышто счетоводлан ыштен, вара йытын заводыш куснен. Пашаштак ончыкылык пелашыж дене палыме лийын, да Чепайкиныт кум йочам ончен куштеныт.
Илалше ийготышто гынат, таче Евдокия Прокопьевна чолга илыш-йӱлам куча, зарядкым ышта, книга ден газетым лудеш, телевизорым онча, куштылгырак сурт сомылкам шукта.
Маргарита ИВАНОВА.
Марий Элын Паша да социальный аралымаш министерствыжын пресс-службыжын фотожо.
