31 май – 1 июнь йӱдым Российыште Брянск областьыште автомобиль кудалыштме да Курск областьыште поезд кудалыштме кок кӱварым пудештареныт.
Тыгай кугу ойго Российын да Украинын делегацийже-влакын Стамбулышто тыныс нерген вашлийын мутланымышт деч ик кече ончыч лийын.
«Тушто еҥ-влак коленыт да сусыргеныт. Нунын коклаште йоча-шамычат лийыныт. Ӱшанем, азапын амалжым лишыл жапыште рашемдат да титакан-влакым наказатлат. Колышо-шамычын родо-тукымыштлан пеҥгыдылыкым, сусыргышо-шамычлан писынрак тӧрланаш тыланем», – тидын шотышто манын Марий Элын вуйлатышыже Юрий Зайцев.
Террорист акт нерген шке шонымашыштым Марий Эл Кугыжаныш Погынын икмыняр еҥжат каласен.
Михаил Васютин, Марий парламентын председательже:
– Брянск ден Курск областьлаште кӱвар-влакым пудештарымым, россий олалашке поснак пытартыш кечылаште моткоч шуко пилотдымо аппаратым колтымым тушманын калыкым лӱдыкташ да Стамбулышто тыныс нерген мутланымашым лугыч ышташ шонымыж семын аклем.
Украин террорист-влакын тиде осал пашашт тушманын передовойышто да честный кредалмаште вийдыме улмыжым ончыкта.
Ме палена, чондымо еҥ-влакын осаллыкышт ваштареш иктыш ушнен гына шогаш лиеш.
Мемнам лӱдыкташ огеш лий! Пырляште ме чыла илен лектына да сеҥена!
Лариса Яковлева, Кугыжаныш Погын председательын икымше алмаштышыже, «Единая Россия» фракцийын вуйлатышыже:
– Брянск ден Курск областьлаште кӱвар-влакым пудештарымаш – террорт акт. Тудо элыштына илыше тыныс калыкым лӱдыктымашке да Стамбулышто тыныс нерген мутланымашым лугыч ыштымашке виктаралтын.
Чыла тиде теве мо нерген ойла: тушманын фронтышто мемнан сеҥаш ӱшанже йӧршын уке. Сандене мый чыладамат ик тичмашыш ушнаш, икоян да тӱткӧ лияш ӱжам.
Мемнан шуко нациян россий ешна, тыгак фронт ден тыл ик командыш ушнышаш да сеҥымашым лишемдышаш.
Эдуард Иманаев, Кугыжаныш Погынын депутатше, «Марий книга савыктыш» пӧртын директоржо:
– Ме простажак огыл жапыште илена. Тидым чылан шижына.
Брянск ден Курск областьлаште ыштыме эҥгек – диверсий гына огыл, а тыныс калык ваштареш теракт. Тушман фронтышто сеҥен огеш керт да тылыште террорист лийын! Да икымше гана огыл.
Тиде янлык койыш лӱдмашым огыл, а шыдым гына луктеш да чыланамат иктышке чумыргаш ӱжеш. Ме ваштарешна салтак-влакым огыл, а бандит-шамычым ужына. Тидыже мемнам чын да элнан лӱдыкшыдымылыкшӧ верч эшеат талын кредалаш тарата.
Тушман кырен шалатыме лийшаш, да элна тидым ышта.
Маргарита ИВАНОВА ямдылен
