Марий Элыште эн сай тоштер пашаеҥ-влакын профессионал конкурсышт иктешлалтын.
Ойыртемалтше-влакым Т.Евсеев лӱмеш национальный тоштерыште торжественно палемденыт.
Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Консантин Иванов шукерте огыл эртыше Тоштер-влакын тӱнямбал кечышт дене чылаштым саламлен да посна номинацийлаште, тыгак сай паша дене ойыртемалтше-влаклан дипломым да министерствын ведомственный наградыжым кучыктен.
Тений конкурсыш кугыжаныш, муниципал, ведомственный, частный, тыгак образовательный организаций-влакын тоштерышт ушненыт. Финалыш 20 еҥ лектын. Мутлан, «Профессийлан ӱшанле улмо» номинацийыште Козьмодемьянскысе тоштер-комплекс гыч Елена Лукьянова ден Шереметев замок гыч Ирина Шлейниковам палемденыт. «Стандартный огыл музейщик» чаплӱмым Т.Евсеев лӱмеш национальный тоштер гыч Мария Гордеева налын.
Ведомственный, частный да школ тоштер-влак коклаште Волжский район Карай школ тоштер вуйлатыше Алевтина Гордеева сеҥыше семын палемдалтын.
«Российысе калык-влакын икоян улмо идалыкыште те чылаштлан ончыктеда: икоян улмына – чыныште. А тиде чынжым пеш моштен, арален, шке фондлаштыда те уэмден толыда да ончерла гоч палдареда, тендан деке толшо калыклан тӱрлӧ экскурсий, проект гоч намиен шуктеда», – каласен Константин Иванов.
Снимкылаште: Алевтина Гордеева саламлымашым налеш; сеҥыше-влак – чылын пырля.
Светлана Носован фотожо.
