Фотолаштык
Михаил СКОБЕЛЕВ,
Лидия ШАБДАРОВА
Кугыжанышнан историйжым аралат
Кычалше-влакын Россий толкынышт «Без срока давности» федеральный проектым 2018 ий гыч илышыш шыҥдара. Нуно икмыняр организаций дене пырля ты пашам эртарат. Нацист-шамычын орландарыме еҥ-влакын капыштым кычалыт, кӱнчен луктыт, геноцид дене кылдалтше архив материалым шымлат, савыктат, тӱрлӧ выставкым, лекцийым, шанче-практике конференцийым, форумым, студент проектлам, фестивальым, самырык-шамычлан конкурсым эртарат. Проект эртыме жапыште «Без срока давности» сборникын 25 томжым савыктыме.
«Герои Отечества» рӱдерыште тоштерын пашаеҥже Степан Новожилов мыланна чыла радамлын умылтарен. Тудо геноцид дене тӱкнышӧ еҥ-влакын документыштым, Украинысе школлаште таче кечын кучылталтше учебниклам ончыктен. Книгам шергалмеке, пошкудо элыште йоча-влаклан шояк историйым туныктымо вигак шинчалан перна.
Тоштерыште Кугу Отечественный сар жапысе Йошкар Армийын боецшын наборжым, сӱретче Андрей Санниковын плакатше-шамычым, ППШ-м, Томпсонын автоматше-влакым, Вальтерын пистолетшым ужаш лиеш. Кажне мийыше саргуралым шке кидше дене кучен ончен кертеш. Тылеч посна таче кечын СВО-што кучылталтше тӱрлӧ масксетьым, саргуралым, дроным, амуницийым чумырымо. Экспозицийыште трофей-влакат улыт: тушманын шевронжо, инструкцийже-влак.
Лач тыгай тоштерлаште кугыжанышнан историйже аралалтеш. Тушко миен да чылажымат шке шинчана дене ужын, кочана ден кугезе кочана-влакын Икымше тӱнямбал, Кугу Отечественный сарлаште, СВО-што ыштыме подвигыштым огына мондо. Нунын лӱмышт элнан да республикнан историйыштышт курымешлан возалтыныт.
Михаил Скобелевын фотожо.
