Марий кундем эше вич илемлан шагалрак лийын.
Кужэҥер районысо депутат-влак погынымашын пунчалже почеш Руш Шой ял шотан илемыш пурышо Кульшит ял ынде ок лий. Кеч тушто илышыже эше кандашын улыт. Но ялым пошкудо Ананурыш ушаш кӱлмӧ нерген тусо калык шкежак пунчалын. Тидлан амалжат лийын: шке вий дене гына газым пуртен огыт керт. А пошкудо Ананурышто «канде тулжо» уло. Сандене тудын посна уремже семын газым пуртен шуктымо кугыжаныш льготан программыш логалаш куштылгырак.
Кодшо ийынат ты районышто лач ты амал денак кум ялым иктыш ушеныт: Колотким – Кужэҥер посёлкыш, Лажмучашым – Шорсолаш да Руш Лаждӱрым – Йӱледӱрыш. «Тений шыжылан тушко «канде тул» толын шушаш», – каласыш районысо депутат-влак погынымаш вуйлатыше Ольга Фокина.
Кульшит семынак У Торъял районыштат ныл ял карт гыч йомеш. Нуным тыгак газым пурташ йӧн лекше манын ушат: Кугу КЕмсола ден Изи Кемсолам – Токтарсола ден, Элеволкым – Ӱлыл Макматыш, Пактекым – Кӱшыл Макматыш, Эшпайродым – Кугу Нурмаш. Тидын шотышто Марий Эл Кугыжаныш Погынын пытартыш сессийыштыже пунчалым луктыныт.
С.Носова
Авторын фотожо
