Конкурсым Марий Элын Тӱвыра, савыктыш да калык-влакын пашашт шотышто министерствыжын полшымыж дене С.Г.Чавайн лӱмеш книгагудо тений 11-ше гана эртарен. Тений тушко 263 йодмаш пурен. Нунын коклаште посна автор, дизайнер, книгам чумыршо, савыктыше организаций, редакций, тунемме заведений, науко, тӱвыра учреждений-влак лийыныт. Марла книгаже 100 утлаш погынен. Конкурс организатор-влак Тиште пайремлан лӱмын конкурсыш пурышо ятыр книгажым посна ончерыш чумыреныт. Тудо театрын фоештыже ончыкталтын. Могай сынан нуно лийыныт? Поэзий сборник, шанче паша, марий кундем, посна илем-влак, марий сымыктыш нерген савыктыш-влак да молат.
Тений конкурсыш пурышо книга-влакым 11 номинацийыште акленыт. Жюрин пунчалже почеш, идалыкын эн сай книгажлан «История Йошкар-Олы» тӱшкан ямдылыме монгорафийым (МарНИИЯЛИ, МарГУ, Йошкар-Ола администраций, ответственный редактор-влак ¬А.Г.Иванов, О.А.Кошкина, Е.П.Кузьмин) шотлымо.
Моло номинацийыште ойыртемалтше книга-влакымат ончыктена:
«Книгам эн сайын художественно-полиграфически сӧрастарымаш» – «Горномарийская свадьба. Кырык мары сӱӓн. Hill mari wedding» книга-альбом (Марий книга савыктыш пӧрт, дизайнер – Валентина Безденежных), тыгак «Основы изобразительной грамоты» тунемме пособийже (дизайнер-влак – Валерий Чеботкин ден Валентина Безденежных);
«Марий йылме дене эн сай книга» – Анатолий Мокеевын «Улам ХХ курымын эргыже» поэзий аршашыже;
«Марий Эл нерген эн сай книга» – Галина Смирнован «Долгожданная дорога: история становления железнодорожного транспорта в Марийском крае, 1867–1928 гг.» книгаже;
«Образований ден наукылан эн сай книга» – «Черемисы в источниках. Т. 1: Сочинения иностранцев VI-XVIII вв.» (А. Бахтин чумырен) да «Предмет, образ, символ: к истокам марийской культуры» (авторжо-влак – Т.Б.Никитина, В.В.Никитин, Д.Ю.Ефремова);
«Художественный прозан эн сай книга» – Николай Кропиновын «Деревенские» повесть ден ойлымашыже-влак;
«Эн сай позий сборник» – Геннадий Оярын «Припадаю к истокам» книгаже;
«Йоча да самырык-влалан эн сай книга» – Владимир Егоровын «Пöршаҥше ломбыгичке» ойлымашыже-влак;
«Шочмо кундем нерген эн сай книга» – Алексей Клёновын «Пектубаевский район: страницы истории (1936-1959)» книгаже;
«Ойыртемалтше еҥ-влак нерген эн сай книга – Ольга Требушкован «Мечта, ставшая судьбой: жизнь и научная деятельность В.С.Патрушева» да Г.В.Рокинан, Е.В.Пинегинан, В.А.Самохинын пырля ямдылыме «Дом на Коммунистической» книгашт;
«Патриот шӱлышан эн сай книга» – Дина Рычкован «Воины Отчества» книга серийже.
Тыгак «Лудшо-влакын симпатий призышт» номинацийыште Татьяна Косаревам («Тренер чистой воды. Исповедь одиночки» книгажлан) да «Книгагудо дене сай кылым кучымылан» музеевед, историй науко кандидат Анатолий Муравьёвым палемденыт.
Светлана Носова
М.Скобелевын фотожо
