Лӱмгечылан – у савыктыш
«Колумб лудмаш»
Тыге маналтеш «Марий книга издательстве» савыктыш пӧртын лукмо у книга.
Тиде книга «Марий Эл» газет лекташ тӱҥалмылан 110 ий да кумдан палыме марий поэт Валентин Колумбын шочмыжлан 90 ий теммылан пӧлеклалтын. Кок дате коклаште могай кыл, маныда? Тӱҥ марий газетна марий сылнымут мастар-влакын, тидын шотыштак поэт Валентин Колумбын, творчествыштым почын ончыктымылан эреак кугу тӱткышым ойырен. Колумб лудмаш нергенат тудым эртараш тӱҥалме годсек эреак радамлын каласкален. Шагал огыл журналист тышке ушнен. Но утларакше тиде пашам поэт да журналист Юрий Исаков шуктен да кызытат шуктен шога. Тудак газетыште лекше савыктышлам кок кугу дате лӱмеш ты сборникыш чумырен.
Книга дене палдарыме презентаций эн ончычак Йошкар-Олаште Республикысе йоча ден самырык-влакын В.Х.Колумб лӱмеш книгагудышто 20 майыште 10 шагатлан лиеш. Туштак 11 шагатлан Валентин Колумбын 90 ияш лӱмгечыжлан ола кӱкшытан лудмаш эртаралтеш. Лудмашке тӱҥ шотышто йочасадыш коштшо да школышто тунемше-влак ушнат. Ончыч лудмаште таҥасыше, кызыт вузлаште тунемше студент-влакат толыт, шонена.
Вес арняштак, 23 майыште, 11 шагатлан Морко рӱдӧ книгагудышто презентаций лиеш. Тушко районысо книгагудо-влакын пашаеҥышт, школласе туныктышо ден тунемше, Валентин Колумб лудмашын чолга еҥже-влак погынат.
Кок презентацийышкыжат Марий книга савыктыш у книгам намия.
Юрий ИСАКОВ.
Снимкыште: «Колумб лудмаш» книга.
Авторын фотожо.
