Марий Элыште федеральный кугорныла воктене кийылтше 60 кубометр утла шӱкшакым погымо
Федеральный дорожник-шамыч «Волго-Вятскуправтодор» управленийыш пурышо корнылаште, воктеныже, тыгак каналтыме верлаште эрыктыме пашам шуктат. Тыгак корно знак, авыртыш, увер щит, йолешке-влаклан эрташ палемдыме вер, автобус остановко-влакым мушкыт. Тиддене пырля кугорнылаште могай технический средство-влак шаланеныт але пашам ыштымым чарненыт, нуным тӧрлатат, ачалат. Кажне кечын ты сомылым 10 пашаеҥ ден 6 технике шуктат. Тыге кызытсе жаплан автомобиль корно участкыла гыч 64 кубометр шӱкшакым погеныт.
Дорожник-шамыч веле огыл, корно воктене тӱрлӧ услугым темлыше сервис-влакын озашт ден пашаеҥыштат айлыме кумдыкыштым шотыш кондат. Нуно парковкылам, пурымо да лекме верлам эрыктат, тӱзатат.
Игече утларак шокшо лиймеке, подрядный организаций-влакын пашаеҥышт автомобиль корнылаште тӱрлӧ элементым чиялташ, разметке-влакым уэмдаш, кушто кӱлеш гын, угыч ышташ тӱҥалыт.
Л.Камалетдинова
