КУЧЕМ УВЕР

50-ше погынымашлан ямдылалтыт

Тиде кечылаште Марий Эл Республикын Кугыжаныш Погыныштыжо Россий Федерацийын Юл кундем федеральный округшын субъектше-влакын кугыжаныш кучем законодательный (представительный) органже-влакын ассоциацийыштын юбилейный 50-ше заседанийжылан ямдылалтмаш кая. Тудо Йошкар-Олаште 2 июньышто лиеш.

Юл кундем федеральный округышто социально-экономический нелылык ден элын мер-политике илышыштыже эн кӱлешан йодыш-влакым ончышо тиде консультативный органым ыштыме нерген решенийым лачшымак Йошкар-Олаште 2001 ий 14 декабрьыште луктыныт. Тунам ты округыш пурышо кугыжаныш кучем законодательный орган-влакын вуйлатышыштын совещанийышт эртен. Тушто Россий президентын Юл кундем федеральный округышто полномочный представительже Сергей Кириенко лийын. Совещанийыште Ассоциацийым ыштыме деч посна тудын икымше координаторжым – Саратов областьысе Думын председательже Александр Петрович Харитоновым – сайленыт. Тыгак Ассоциаций нерген положенийым, тудым ыштыме нерген Соглашенийын проектшым онченыт. Вараже нуным округысо чыла субъектыш региональный парламентарий-влак дене каҥашаш да ойым пидаш колтеныт.

2 июньышто лийшаш 50-ше заседанийыште регион-влакын паша опытышт дене палыме лияш да тӱвырам, спортым, туризмым вияҥдыме, тыгак ужар кушкылан кумдыклаште транспортым шогалтымылан да кудалмылан административный ответственностьым правовой велым рашемдыме дене  кылдалтше йодыш-влакым каҥашаш палемдат.

Л.Камалетдинова.

Опубликовать в Одноклассники

Добавить комментарий