Советский районысо Кельмаксолаште акрет годсек илыше икмыняр тукымым палемдат. Тиде радам гыч Ермаковмытат кумдан чапланеныт. Тачысе лаштыкнан унаже – Марий Эл культурын сулло пашаеҥже Леонид ЕРМАКОВ.
Леонид Серафимович ялысе школ деч вара Йошкар-Оласе Рембыттехникыште шагат мастерлан тунемын. Ик жап районысо быткомбинатыште пашам ыштымекыже, армийыште службым эртен. 1975 ийыште ялысе тӱвыра пӧртыш толын да ынде 47 ий чон йодмо сомылжым шукта. Тыршен пашам ыштымыжлан «Калык чон» премий, «Калык верч тыршымаш» шарнымашан медаль дене палемдалтын.
Самырык вуйлатыше
Художественный вуйлатышылан идалык наре тыршымеке, тунамсе вуйлатыше Николай Никанорович Киртаев паша гыч каен да олмешыже ты сомылым самырык рвезылан ӱшанен коден. А тудо вуйлатыше веле огыл, концертмейстер, аккомпаниатор, плотник да молат лийын. Идалык утла тӱвыра пӧртыштӧ пашам ыштымеке, Л.Ермаков Лайсола ялын ӱдыржӧ, Галина Рябинина, дене палыме лиеш да тудым марлан налеш. Пелашыже мӧҥгыштыжат, пашаштыжат ик эн ӱшанле полышкалышышкыже савырна: художественный вуйлатышын сомылжым шукташ тӱҥалын. Вате-марий, икте-весым умылен, ваш-ваш полшен, тӱвыра илышым виктарен колтымаште тыршеныт.
– Тунам клубыштына нимогай коллективат лийын огыл, но кас еда мураш, кушташ йӧратыше-влак моткоч шукын чумыргенна, поснак шкенан да Николай Никаноровичын ешыж гыч ятырын лийынна, – шарналтыш Леонид Серафимович. – Варажым ялла гычат эркын-эркын толедаш тӱҥальыч. Тыге 1983 ий июньышто мураш, кушташ, семӱзгарым шокташ йӧратыше-влак чумыргенна да Пеледыш пайремыште мастарлыкым ончыктенна. Вара уэш шыжым, ноябрьыште, калыкым концертыш погышна да тунамак ансамбльнам «Муро аршаш» манын лӱмдышна. Кудло наре еҥ тушко чумыргенна.
Тиддеч вара коллективын участникше-влак, коклаштышт мутланен келшыме почеш, тошто лудыш мурым погеныт, яллашке лектын, илалше-влак деч шке могыр мурым чумыреныт…
!!! Умбакыже «Марий Эл» газетыште лудса!
А.БАЙКОВА
Фотом еш альбом гыч налме
