Марий Эл вуйлатыше Юрий Зайцев республикысе Элгӧргӧ паша министерствын коллегийжын заседанийыштыже лийын. Тушто 2022 ийыште оперативно-служебный паша кузе кайымым иктешленыт да тенийлан мом ыштышашым палемденыт.
Республик вуйлатыше эн ончычак министерствыште тыршыше-влаклан региональный сайлымаш ден тӱшка мероприятий-влакым эртарыме годым общественный порядкым сайын эскерымылан тауштен. А кызыт специальный военный операций кайымылан кӧра правам аралыше орган-влаклан посна кугу нелыт ышталтын манын палемден.
– Экстремист сынан тӱрлӧ провокаций ден акт-влак ынышт лий манын, мыланна вийым иктеш чумырыман. Российын президентше да кучем орган-влак нерген пагалыдымашым ончыктен, Россий Федерацийын Вооруженный Вийжым шӱктарен ойлышо-влак шотышто мерым тыманмеш ышташ йодам, – каласен Юрий Зайцев.
Марий Эл вуйлатыше палемден: ӱмаште неле ден поснак неле преступленийым, мошенничестве палдырныме, транспортым шолыштмо факт-шамычым тӱжваке лукмо шотышто показатель-влак саемыныт. Туге гынат тудо чыла тиде осал пашам ыштыме ваштареш у йӧн-влакым кычалмашым умбакыже шуяш темлен. Тыгодым, ешарен Юрий Зайцев, корнылаште туткар тугак чӱчкыдын лиеда. Сандене тидлан, тыгак ийготыш шудымо-влак коклаште адресный профилактический пашам ыштымылан, национальный проект-влакым илышыш шыҥдарымылан, йырым-йырысе пӱртӱсым аралымылан эшеат кугу тӱткышым ойыраш йодын.
Республикысе Элгӧргӧ паша министерствын шуктымо пашаже нерген утларак радамлын министр Андрей Вырвич каласкален. Тыгак Марий Элыште Тӱҥ федеральный инспектор Павел Волков, республикын прокуроржо Сергей Беляков, Марий Эл Кугыжаныш Погын председательын икымше алмаштышыже Владимир Мухин, Марий Элысе УФСИН начальник Игорь Третьяков докладым ыштеныт.
Пытартышлан Юрий Зайцев ден Андрей Вырвич республикысе Элгӧргӧ паша министерствыште тыршыше ойыртемалтше пашаеҥ-влаклан наградым кучыктеныт.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
