Российыште региональный вияҥмаш шотышто правительственный комиссийын президиумжын эртарыме заседанийыштыже Марий Эллан пассажир-влакым шупшыкташ 40 автобусым ойыраш йодмашым сайлан шотленыт. Заседанийым РФ правительстве председательын алмаштышыже Марат Хуснуллин вӱден.
Транспорт единице-влак налмын сай социально-экономический велжылан республик вуйлатыше обслуживанийын качествыже саеммылан кӧра пассажир-влакым шупшыктымо йогын кугеммым шотла.
«У автобус-влакым налмаш 100 еҥлан официальный паша верым почаш, социально кӱлешан объектлашке миен шуаш, посна категориян граждан-влаклан льготан акым палемдаш, единый проездной билетым кучылташ полша», – каласен Юрий Зайцев.
Пассажир-влакым шупшыктышо транспортын подвижной составшым специальный казначейский кредитым шеледыме кӱшеш налаш палемдыме. Автобус-влакым 2024 ий 1 февраль марте конден шуктышаш улыт.
Специальный казначейский кредит, кӱлешан инфраструктурым ыштымылан кӧра, регион-влаклан гражданже-шамычын илышыштым саемдаш ешартыш йӧным пуа, рашемден РФ правительстве председательын алмаштышыже.
«Инфраструктуран казна кредит-влак программе субъектлаште кумдан кучылталтеш, шкенжын сай лектышыжым ончыктен, тудым умбакыже шуена. Тӱшка калыкым шупшыктышо транспортым специальный казначейский кредит кӱшеш уэмдаш икымше йодмаш-влакым сайлан шотлымо. Тидлан кӧра регионышто илыше-влак йӧнан у автобус-влакым вучен шуктат», – палемден Марат Хуснуллин.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Фотом Марий Эл Правителствын ВКонтакте соцкылысе тӱшкаж гыч налме
