Черетан тунемме идалык мучашке лишемын, сандене Россий кӱкшытан «Профессионалитет» федерал программе кышкарыште 2022 ийыште Юл кундем кугыжаныш технологий университетын Йошкар-Оласе аграрный колледжыштыже почмо «Агротехник» кластерын амбассадоржо-влак приёмный кампаний вашеш эшеат чолган тыршат – ялозанлык дене кылдалтше профессий нерген рӱдоласе веле огыл, районласе школлаште тунемше-шамычлан каласкалат.
Шошын пытартыш тылзынже нуно кок кундемым авалтеныт. Май кыдалне Медведево районышто лийыныт. Пекшиксола тӱҥ, Руэм да Нурма кыдалаш общеобразовательный школлаште шинчымашым погышо-влаклан «Профессионалитет: тый сай компанийыште улат» класс шагатым эртареныт. Тыгак кыдалаш профессионал образований системын вияҥмыже, «Агротехник» кластерын темлыме специальностьшо-шамыч да тудын республикысе ик эн ончыл предприятий-партнёржо-влак дене кыл, тунемаш пурымо правил, тӱшкагудо, стипендий да шуко моло нерген каласкаленыт, тунемше-влакын йодышыштлан вашештеныт.
Май мучаште амбассадор-шамыч тыгаяк класс шагатым Советский районысо Алексеевский ден Вечын кыдалаш школлаште эртареныт.
Эртыше кечылаштак Йошкар-Оласе аграрный колледжын актовый залыштыже «Семёновский», «Шойбулакский», «Победа», «Первый Май» ялозанлык предприятий гыч специалист-шамыч дене вашлиймаш лийын. Нунын деч посна тушто республикын Кресаньык (фермер)-влакын ассоциацийыштын, «Казанское» да «Агрорегион» ООО-н еҥже-влак лийыныт. Нуно выпускник-шамычлан предприятийлаштышт улшо паша вер, оборудований, пашам ыштыме условий, пашадар, йодмаш да моло нерген палдареныт. Тыгак вашлиймаште Марий Эл ялозанлык да кочкыш сату министрын алмаштышыже Людмила Смирнова лийын. Тудо республикыштына ялозанлык отрасльыште экономике сӱрет дене палдарен, самырык специалистлан кугыжанышын полышыж нерген ойлен.
Г.Кожевникова
Снимкыште: Медведево район Нурма школышто класс шагат годым.
Фотом «Агротехник» кластерын сайтше гыч налме
