Тулык да ача-ава деч посна кодшо 120 самырык еҥ Йошкар-Ола кумдыкыш пурышо Семеновка селаште чоҥен шогалтыме шуко пачашан у пачерыш илаш пурен. Марий Эл вуйлатышын пашажым жаплан шуктышо Юрий Зайцев нунылан сравочым кучыктен.
«Илышыштыда ятыр нелылыкым, йомдарымашым чыташ пернен, но ынде шкендан пачерыштыда пиал шӱлыш дене илаш тӱҥалыда», – каласен тудо.
Йошкар-Олан мэрже Евгений Маслов эн ондак республикын правительствыжлан таум ыштен, молан манаш гын, тулык да ача-ава деч посна кодшо йоча-влаклан илыме верым чоҥаш окса регионын бюджетше гыч ойыралтеш. Ешарен: «Тений рекордыш шуынна. Тымарте нигунамат иканаште 120 сравочым кучыктен огынал, эше 64 пачер чоҥалтеш, тугеже ончыкыжым кокшӱдӧ наре йоча пачеран лиеш».
Тиде гана пиал Елена Албахтиналат шыргыжалын. Ӱдырын илыме верже шотышто нелылыкыш логалме йодышым Юрий Зайцевлан шкаланжак рашемдаш пернен, тунам тудо, пӧрт ямде лиймеке, сравочым шке кидше гыч кучыкташ сӧрен. Теве, кум арня эртымеке, мутшым шуктен, Елена дене пырля у пачержым ончен савырнен, тыгодым чоҥымо пашан качествыжым терген. Юрий Зайцев у пачерыш илаш пурышо-влакым саламлен, «шке сурт – тиде шкевуя илыш деке кугу ошкыл» манын палемден. Начарын коштшо-влакын пачерышкыштат пурен ончал лектын, пашам сайын шуктымым да йӧнан планировкым палемден.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
