УВЕР ЙОГЫН

Марий Элын вуйлатышыже сӱретче Сергей Адлушкин деке унала миен

Марий Эл Республикым вуйлатыше Александр Евстифеев паша дене Курыкмарий районышто лиймыж годым сӱретче Сергей Адлушкин деке унала пурен. 

Сӱретче Латансола ялыште верланыше Алдушкинмытын тукым илемыштыже ила, тушто шкешотан тоштерым ыштен, акрет  годсо арверым чумырен. Туштак ачажын сӱретше-влакымат ужаш лиеш. Алдушкинын ойлымыж почеш, ачаже ты мастарлыклан тунемын огыл гынат, 22 ияш годымжак икымше пашам возен, да тудо сӱретчын коллекцийыштыже ик эн шергылан шотлалтеш.

Вара регион вуйлатыше ден сӱретчын мутланымашышт тудын творчестве пӧртышкыжо куснен. Сергей Алдушкин  тидлан лӱмын посна оралтым нӧлтен. Тушто мастерскойлан, тыгак галерейланат вер уло. Тӱрлӧ вашлиймаш лач тушто эрта, йолташыже-шамычат тушто илен да пашам ыштен кертыт. Волгыдо кугу залыште изак-шоляк Алдушкинмытын веле огыл, Российысе да Марий Элысе сӱретче-влакын пашаштым ужаш лиеш.

 Александр Евстифеев сӱретчын творчествыж дене палыме лийшыла, кызытсе тӱвыра, искусство дене кылдалтше йодыш-влакым каҥашен.  Алдушкин тыгак Латансола ял калыкын тачысе илышыже дене палдарен. Творческий паша деч посна тудо эше кундемжын историйжым шымла, ялжын исторический картшымат ыштен. Тушто колымшо курым тӱҥалтыште пӧрт-влакын могай номер дене вераҥмыштым ончыктен. Тушто илыше еҥ-влак, родо-тукымыштын пӱрымашышт нерген поян материалым поген.

Александр Евстифеев сӱретчын творчествыжым ойыртемалтше, ончышым илаш, пашам ышташ кумыландыше семын палемден.

— Мый тыланда умбакыжат кумыл толкыным, сеҥымашыш шуаш, тунемше-влакым тыланем, кеч те эше шкежат самырык улыда. Творческий, интеллектуальный куатдам илышыш шыҥдарен шуктен огыдал, но шкендан школ, тунемше-влак нерген шоналташ лиеш. Нуно тыланда шонымашдам илышыш шындараш полшаш тӱҥал кертыт. Сӱретче тукымдам шуяшак кӱлеш. Шочмо верыштыда илыме да пашам ыштыме дене республикысе калык кугешнен кертеш, — палемден регион вуйлатыше.

 Каласен кодыман: Сергей Алдушкин Латансола ялыште 1967 ийыште шочын. 1986 ийыште Йошкар-Оласе художественный училищым, вара В.И.Суриков лӱмеш Москосо кугыжаныш художественный институтым тунем лектын. Францийысе Тӱнямбал искусство школышто стажировкым эртен. Тудо акварель дене сӱретла. Марий Эл Республикын сулло сӱретчыже лӱмым сулен. Пашаже-влак Йошкар-Оласе Изобразительный искусство тоштерын экспозицийыштыже, Плёсский кугыжаныш историко-архитектур тоштер-заповедникын Пейзаж тоштержын, В.Д.Поленов лӱмеш кугыжаныш историко-художественный тоштер-заповедникын, Валаам монастырьын, Троицко- Сергиевый лаврын, Руш живописьым йӧратыше Обществын, тыгак США-ште, Германийыште, Францийыште, Испанийыште илыше-влакын частный коллекцийлаштыже  аралалтыт.

 Марий Эл Республик вуйлатышын организаций-аналитике виктемыжын уверже негызеш С.Носова ямдылен.

Опубликовать в Одноклассники

Добавить комментарий