Йошкар-Оласе 9А микрорайонышто «Молодёжь да йоча-влак» национальный проект почеш у школым чоҥаш тӱҥалыт.
Проектым 2025-2027 ийлаште илышыш пурташ палемдыме. Чоҥымо объектын тӱҥалтыш акше (оборудований деч посна) – ик миллиард теҥге, тиде окса кугытыш 2026-2027 ийлан Йошкар-Ола округын бюджетше гыч ешартыш средства пура. Кызыт подрядный организацийым палемдаш конкурс эрта.
Проект дене келшышын, у школ 1100 веран. Физкультур-спорт, каныме, озанлык, тунемме да опытым эртарыме кумдык-влак деч посна тӱҥалтыш военный ямдылалтмашлан посна вер лиеш.
13 февральыште Марий Элым вуйлатыше Юрий Зайцев «ЕДИНАЯ РОССИЯ» калык программе почеш образовательный объектлам капитально олмыктымо да чоҥымо дене кылдалтше программым илышыш пуртымылан пӧлеклалтше селекторный совещанийыште лийын. Тудо «ЕДИНАЯ РОССИЯ» партиийын генеральный советшын секретарьже Владимир Якушевын да Россий Федераций Просвещений министр Сергей Кравцовын вуйлатымышт почеш эртен.
«Образований» национальный проект почеш 2024 ийыште регионыштына кок школ чоҥалтын: Йошкар-Оласе 32-шо №-ан (110 веран) да Медведево район Руэм посёлкысо школын блокшо (725 веран).
Ӱмаште кеҥежым Марий Элыш толмыж годым Владимир Якушев 32-шо №-ан школын у тунемме ийлан ямде улмыжым аклен.
Марий Эл тыгак кыдалаш профессионал образованийым пуымо верлам капитально олмыктымо дене кылдалтше программыш ушнен. 2025 ийыште Автодорожный техникумын тунемме корпусшым, Йошкар-Оласе строительный техникумын тӱшкагудыжым ачалаш палемдыме. Тунемме корпусым уэмдыме пашам 2025-2026 ийлаште кок этап дене ышташ тӱҥалыт. Кызыт подрядчикым ойыраш конкурсым увертарыме.
2025 ийыште республикыштына «Образованийын школ системыжым уэмден вияҥдымаш» федеральный программе почеш 9 общеобразовательный организацийын 10 оралтыжым олмыкташ палемдыме. Чыла объектлан чоҥымо-монтаж пашам ышташ контракт-влак ямде улыт.
Тений Марий Элыште йочасад-влакым капитально олмыктымо дене кылдалтше федеральный программым илышыш пурташ тӱҥалыт. Тушко Марий Турек район Косолоп селасе «Ромашка» ден Волжск оласе 3-шо №-ан «Орлёнок» йочасад-влак пурталтыныт.
Марий Эл Республикым вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
