Йошкар-Олаште «Единый Россий» партийын Мер полыш штабыштыже «Земский почтальон-2026» всероссийский конкурсын регионысо этапшым иктешленыт да эн сай почтальон-влакым палемденыт.
Конкурсыш пӱтынь республик гыч 70 йодмаш пурен. Тышеч финалыш 22 почтальон лектын. Нунылан «Единый Россий» партийын Калык программыжым да «Российысе села» партийный проектым илышыш пуртымаште надырым пыштымыштлан Тауштымашым кучыктеныт.
– Мый шкежат поселкышто илем да социальный сферыште еҥ-влакын моткочак кӱлешан улмыштым сайын умылем. Почтальон-влак мемнам ушат, еҥ-влак дене мутланат, кумылым нӧлтат, – палемден Кугыжаныш Погынын депутатше, «Единый Россий» партийын ончылгоч йӱклымашын кандидатше Наталья Козлова.
Сеҥышыш Медведево район Пурсанур села гыч почтальон Елена Логинова лектын. Лачшымак тудо ынде конкурсын финалышкыже кая. Финал 26 майыште Москваште лиеш.
- Любовь Камалетдинова
