Российын почтыжо «Йоча тӱнялан» еком-бизнесын логистикыжым писемдаш полша.
Марий Элыште, Татарстаныште, Чувашийыште да Удмуртийыште, тыгак Самара, Оренбург, Киров да Ульяновск областьлаште илыше-влакын онлайн-заказыштым Казаньысе «Йоча тӱня» шеледыше у рӱдерыште погаш тӱҥалыт.
Федеральный почто операторын Казаньысе логистике рӱдерыштыже ритейлерын шеледыше рӱдержым ыштыме нерген ойпидышым «Йоча тӱня» ГК ден «Российын почтыжо» АО ыштеныт.
Шеледыше рӱдер 2021 ий кокымшо кварталыште пашам ышташ тӱҥалшаш. Тудо логистике рӱдерын 8 тӱжем квадрат метр кумдыкшым айла. Российын почтыжо «Йоча тӱнялан» фулфилмент услугым пуа: интернет-заказым тичмашнек обработатла – аралыме да комплектоватлыме гыч тӱҥалын, адресат деке наҥгаяш пуымо марте.
«Мемнан цельна – онлайн-заказын 80 процент деч шагал огыл ужашыжым адресат деке вес кечынак намиен шукташ. Казаньыште кокымшо рӱдерым почмо дене Юл кундем федеральный округышто илыше-влак онлайн-заказыштым эшеат писын налаш тӱҥалыт. Тыгодым «Йоча тӱня» ГК 2022-2024 ийлаште эше кок региональный да кок федеральный рӱдерлам почаш палемден», — манеш «Йоча тӱня» компанийын генеральный директоржо Мария Давыдова.
«Казань деч 1200 километр коклаште Российын 80 процент калыкше ила. Тидыже чыла сатум заказчик деке ик-кок суткаште намиен шукташ лийме нерген ойла, — палемда «Российын почтыжо» АО-н электрон коммерций шотышто генеральный директоржын алмаштышыже Алексей Скатин. – Российын почтыжо логистике рӱдерыштыже фулфилмент услугым чолган вияҥда. Идалык мучаш марте тыгай шотан хаб-шамыч Новосибирскыште, Хабаровскышто почылтыт, а 2021 ий мучаш марте элыштына уже 15 логистике рӱдер пашам ышташ тӱҥалеш».
Россий почтын 36 тӱжем утла квадрат метр кумдыкан логистике рӱдерже Казань тӱнямбал аэропортышто верланен. Тушто фулфилмент зоно, автоматизироватлыме сортироватдыме рӱдер, тӱнямбал почто алмашталтмаш вер улыт. Рӱдер 12 миллион утла еҥым обслуживатла.
М.ИВАНОВА
