Южо еҥ, шкенжым кычал мумешке, иктаж лу профессийым вашталтен шукта гын, весе ик пашам изинек ойырен налын мошта да вара тудлан эреак шӱман кодеш.
Зоя Александровна ден Николай Андреевич Антоновмытын Волжск ола гыч Руш Шайра ялыш ешге илаш куснымышт годым Серёжалан латкок ий, Лариса шӱжаржылан кандаш ий улмаш. Авашт страховой агентлан тыршен, ачашт чодыра орол лийын. Сотнур кыдалаш школышто кандаш классым пытарымек, Сергей Йошкар-Ола медицинский училищын фельдшер-влакым ямдылыше отделенийышкыже тунемаш пурен. Вара рвезым Совет армий радамыш налыныт, кок ий Чита областьыште, Домна станций пелен улшо воинский частьыште служитлен.
1988 ийыште мӧҥгыш пӧртылмеке, Озаҥ оласе медицинский институтышто шинчымашым погаш тӱҥалын, 1994 ийыште лечебный факультетыште тунеммыж нерген дипломым налын. Волжск олаште «Вашке полыш» службын икымше отделенийыште пашам ыштен, тылеч вара Морко район Кужерысе участковый больницым вуйлаташ ӱшаненыт. Эмлыме пашаште чолгалыкым ончыктымыжым ужын, Морко район рӱдӧ больницысе тӱҥ врачын организаций да методике паша шотышто полышкалышыжлан налыныт.
2000 ий гыч таче кече марте Сергей Николаевич Антонов Волжский районысо Сотнур участковый больницым вуйлата. 2021 ийыште «Марий Эл Республикын сулло пашаеҥже» званийым пуэныт. Чапкагаз дене ятыр гана палемденыт.
Ятыр ий ты пашаште ыштен, куну опытым поген. Шке шинчымашыжымат ий еда пойдараш тыршен. Доктор Антонов деке – эре калык. Больницыште ончыч кудло койко-вер лийын гын, кызыт кумло веле кодын. Коллектив тыште ӱшанле, эҥерташ йӧрале. Эмлат. Пукшат тамлын.
Сергей Николаевич кеч-кӧмат кеч-кунамат колышт налаш, умылаш ямде, психологий шинчымашыже келге. Марла яндарын мутлана. Шуко книгам лудеш.
Пытартыш ийлаште эмлалташ толшо-влак тӱҥ шотышто кугу ийготан улыт. Нунылан вниманий утларак кӱлеш. Эмлалтын, паремын, мӧҥгышкышт кайыме годым ойлымо таумутышт мом шога! Йӧсланен толшо еҥын йол ӱмбаке шогалмыже, куаныше чурийже – кажне врачлан эн шерге тат. Нуно вет идалыкыште але адак тышкак кияш толыт. Ты учрежденийыш уло Волжский районысо калык тӧрланаш толеш. Антоновлан пластический хирургат лияш пернен.
Шкет кодын илыше-влаклан Сотнур эмлыме вер нимучашдыме порылык кумылым ончыкта. Интернат-пӧртыш наҥгайыме деч ончыч тӱрыс документ-влакым ыштен шуктымешке тыштак ашненыт.
Эмлыме пӧрт пелен «Вашке полыш» службо верланен. Тиде пеш сай йӧн, кунам ола гыч огыл, а Сотнур гыч ялыш машина кудал мия, фельдшерым намия.
Антонов кеч-могай жапыштат стационарыш корным куча. Мӧҥгыштыжат шоҥго ача-аважым шкетынак онча. Ялысе врачлан сурт кокласе сомыл ятыр логалеш. Тиддеч посна, яра жапше лекмеке, Сергей Николаевич «Шайра» фольклорный ансамбльыш вашка. Эн ончычшо тӱмырым кырен, ынде шиялтыш денат семым лукташ тунем шуын, шӱвыр декат кумылан, шукерте огыл шӱдӧ ияш гармоньым кычал муын конден. Тудым тӧрлен, ачален, гармоньын мотор семжым колышташ шке семынак тунем шуктен.
Айдемыже вет моткоч тыматле койышан. Кеч-могай йодышым пу – кораҥ ок кай, тичмашын вашешташ тырша. Стационарышке УЗИ аппаратым кондымеке, Антонов тиде оборудованийым шкежак кучылташ тунемын. Вес амбулаторийышкат приёмым эртараш миен лектеш.
Мастарлыкын мучашыже уке. Тыршет гын, чылажат лиеш.
Маргарита УШАКОВА,
Россий журналист ушемын еҥже
Фотом еш альбом гыч налме
