Социальный фонд элысе клиент службылаштыже граждан ден организаций-влакым приниматлыме графикшым кумдаҥден. Март гыч фондын офисше-шамыч тылзын пытартыш шуматкечыж еда пашам ышташ тӱҥалыт. Тиде кечын граждан ден организаций-влак тудын чыла услугыж дене пайдаланен кертыт.
Граждан ден организаций-влакым приниматлыме икымше ешартыш кече 30 мартыште лиеш. Тиде шуматкечын Россий Федераций Социальный фондын Марий Элысе пӧлкажын клиент службыжо-влак 8 гыч 14 шагат марте пашам ыштат.
Фондын тылзаш паша радамышкыже эше ик кечым ешарыме дене утларак клиентым обслуживатлаш йӧн лиеш. У график поснак пашам ыштыше-шамычлан келшышаш, молан манаш гын нуно клиент службыш каныш кечын миен кертыт.
Фондын у паша радамже нерген увер лишыл жапыште чыла клиент службышто лиеш. Ешартыш кечын приёмыш толшашлан Соцфонд электрон сервисыштыже ончылгоч возалташ йӧным ышта. Лишыл клиент службын паша радамжым регионысо кыл-рӱдерын 8-800-200-11-70 номеран телефонжо дене рашемдаш лиеш.
М.ИВАНОВА
РФ Социальный фондын Марий Элысе пӧлкажын пресс-службыжын фотожо
