«Марий Эл» газетын 110 ияш лӱмгечыжым палемдыме идалыкыште ме у рубрикым почына. Тудын йымалан газетнан эртыме корныштыжо кышам кодышо фотосӱрет-влакым савыкташ тӱҥалына.
Редакцийын журналистше-влак кажне кечын республикыште веле огыл, элыштына шолшо илыш пӧрдемыште «пӧрдыт». Йошкар-Олаш толшо лӱмлӧ еҥ-шамычат мемнан деке пурен лекде огыт кай. Кажне вашлиймаш – ушеш кодшо, газет лаштыкыш кусарыме историй.
Тыгай вашлиймаш 1999 ий 28 июньышто лийын. Рӱдолашке мемнан землякна, совет да Россий композитор, пианист, туныктышо, мер пашаеҥ, СССР-н калык артистше (1981), СССР кугыжаныш премийын (1976), Ленинский премийын (1986) лауреатше Андрей Яковлевич Эшпай толын ыле. Моткоч проста, кумда тӱняшинчаончалтышан, весела кумылан, талантан еҥ дене вашлиймаш кажныжлан ушеш кодын. Мут толмашеш, тений пагалыме композитор-землякнан шочмыжлан 100 ий темеш.
Каласен кодыман, газетым ыштыме пагыт гычак, редакцийыште сылнымут аланыште веле огыл, мер да политике илышыштат палыме еҥ-влак ыштеныт. Сотемдарче Павел Петрович Глезденев гычак тӱҥалаш гын, шукыштым ушештараш лиеш: Валериан Васильев, Владимир Мухин (Сави), Логин Васильев, Сергей Чавайн, Андрей Эшкинин да шуко молат. Вараракшым Макс Майн, Миклай Казаков, Семен Николаев, Тимофей Петухов, Светлана Эсаулова, Юрий Галютин да молат шарналтыт. Тачат «Марий Эл» газет мер, политике илышлан чолга еҥ-влакым «таптыше апшаткудо» семын кодеш.
Свеитлана Носова
Снимкыште: А.Я.Эшпай дене вашлиймаш годым.
Фотом редакцийын архивше гыч налме.
