Йошкар-Ола воктенысе Семёновка села гыч Татьяна Васильевна Логиновалан верысе администрацийыште кодшо кечылаште «Мать Защитника Отечества» медальым кучыктеныт.
Тудым Роман эргыжын служитлыме верже, Краснодар кундем Кореновск район гыч колтеныт. Пунчалыш верысе муниципал образований вуйлатыше ден тусо горнизон начальник кидпалым пыштеныт.
– Медальым кидыш налмеке, шӱмем лектын вочшашла кӱлткен, а чонышто куан, кугешнымаш. Изирак улмышт годым кажне икшывылан Юмо деч тазалыкым, пиалым йодынам да кызытат йодам, ушан-шотан, калык пагалыме эрге лийышт манын шоненам, – куанжым пайлыш ава. – Эргымын служитлыме кундем гыч толшо тыгай тауштымаш, медаль, шулдырем пуйто куштен. Тугеже икшыве-влакым чын воспитатлыме!
Ешыште – кум йоча
Татьяна Васильевна пелашыже Сергей Михайлович дене кум эргым ончен-куштеныт, йол ӱмбаке шогалтеныт. Рома, Миша да Дима изинекак тунемаш йӧратыше, мут колыштшо лийыныт, икте-весе дене келшен, ваш-ваш полшен кушкыныт. Кугурак эрге-влак Димам куанен йочасадыш коштыктеныт, а школ деч вара мӧҥгышкышт конденыт. «Нылытан» ден «визытанлан» гына тунемыныт, спорт дене кылым кученыт, волейболла, баскетболла модаш йӧратеныт.
– Кеч-могай пашам шкевуя ыштеныт, изинек пеш ответственный лийыныт. Утыждене кугу тӱткышым ойыраш жап лийынат огыл, ме эре пашаште, пашаште, – ойла ава. – Тидыжак, очыни, пеҥгыде койыш-шоктышан лияшышт шӱкалтышым пуэн. Тамакым огыт тӱргӧ, кочывӱд дене кылым огыт кучо.
Службо дене илышым кылденыт
Школышто тунеммышт годымак эрге-влак ачашт гаяк военнослужащий лияш шоненыт. Аттестатым кидыш налмеке, идалык почела шочшо Роман ден Миша Озаҥ оласе кӱшыл командный артиллерий училищыште уш-акылым пойдареныт. Туштак нуно илышым умылаш, шочмо элнам йӧраташ кулмым эшеат келгынрак умыленыт.
– Вузым пытарымеке, Роман ӱдырым нале. Варажым тудо Чечняште службым эртен. Пелашыжат тудо олаштак илен. Но икмыняр жап гыч ешыжге Волгоградыш колтеныт. Тушто латвич ий служитлымеке, Краснодар кундемысе Кореновск олаш кусареныт, – каласкала кум шочшан ава, поро кумылан ӱдырамаш. – А Миша Чечня деч вара Ставрополь кундемысе Будённовскышто, а вара Владикавказыште служитлен. Спецопераций тӱҥалмеке, когыньыштымат элнам аралаш колтеныт. Рома – майор, Курск ола воктене, а Миша – капитан, Запорожье областьыште.
Изирак эргышт, Дмитрий, Семёновкыштак аваж деч тораште огыл посна пачерыште ила. Кыдалаш школ деч вара Йошкар-Оласе строительный техникумым тунемын лектын да икмыняр ий Чоҥымаш, архитектур да илыме-коммунал озанлык министерствыште геодезистлан пашам ыштен. Но трукышто тудат ала молан военный лияш шонен пышта да ола воктенысе частьыш кая. Ынде 15 ий тушто служитла, прапорщик.
– Отпускыш толмыштым пеш чот вучем. Роман ден Миша ӱмаште ачаштым пытартыш корныш ужаташ толыныт ыле. Кеҥежым толыт манын, пельменьымат шукак ямдыленам. Нуно ты кочкышым пеш йӧратат. Вич уныкан кова улам. Шешкым да уныкам-шамыч дене видеокыл дене мутланена, тыге пеленем улмыштла чучеш, – телефоныштыжо изи чукайыштын фотокартычкыштым ончыктен, чонжым почеш Татьяна Васильевна. – Эргым-влак лӱмеш кажне эрдене, сортам чӱктен, молитвам лудам да эрге-шамыч таза капкылан, сайын пӧртылышт манын Юмо деч йодам. Сообщенийым возем да лудмыштым изин-кугун чон вургыж вучем. Вашмутым вигак огыл, жапышт лийме семын веле возен колтат. Тидланат пе-еш йывыртем.
– Отпускыш толмекышт, очыни, кажныж деч чот йодыштыда?
– Мом палаш шонымем – йодам, а уто йодышлан нуно огытат вашеште. Пашашт, службо нерген иза-шольо-влак икте-весе коклаште веле кутыркалат. Мыйым тургыжландарымышт ок шу докан. Теве кодшо гана Роман вуйлатыме штабышкыже тусо телевидений пашаеҥ-влак толыныт да салтак-влакын блиндажыште илымышт нерген съёмкым ыштеныт улмаш. Тудым мыламат ончаш колтен. Мӧҥгысӧ семын туштат пийым, пырысым ашнат, нунын дене шке кочкышыштымат пайлат.
Автомашина дене огеш кудалышт
Татьяна Васильевна ӱмыржӧ мучко автомашиналан шапашым ужалыше кевытлаште ыштен.
– Йошкар-Оласе торгово-кулинарный училище деч вара мыйым тыгай кевытыш ужалышылан колтеныт. Тӱҥалтыште изишак нелырак ыле, но пашам ыштен-ыштен, чылаланат тунемын шуым, – воштылеш ӱдырамаш. – Но автомашина дене ом кудалышт. Тыгай кевытыште пашам ыштымем шукын палат да автомашина денат кудалыштам манын шукын шонат.
Сулен налме канышыш лекмеке, Татьяна Логинова когыльым кӱэштме верыште тырша.
Икшывын тыршымыже – авалан куан. Тиде эреат тыге лийын да лиеш. Кажне ава шке икшывыж верч тургыжлана, чон вургыж мӧҥгыжӧ вуча. Тек тиде ешыштат кажне икшыве пиалан лиеш да шинчашт куанлын йӱла.
Кугыжаныш наградыже-влак:
– Суворов медаль (2019 ий);
– «За боевые отличия» медаль (2022 ий);
– Жуков медаль (2024 ий).
Алевтина БАЙКОВА
Авторын да еш альбом гыч налме фото
