Тылат, салтак!
Ныл автомобиль да молат
Марий Эл гыч специальный военный операцийыште улшо-влаклан черетан гуманитар полышым колтеныт.
Ты гана автомобильым, кӱлеш оборудованийым боец-шамычын ончылгоч йодмышт почешак кум фурыш вераҥденыт.
Правительство председательын алмаштышыже Степан Воронцов регион вуйлатыше Юрий Зайцевлан гуманитар полыш дене СВО зоныш конвойым колтымо манын доложитлен.
– Спецоперацийыште участвоватлыше землякна-влаклан черетан полышым кум фуро дене колтымо. Тушто – мемнан мер пашаеҥ-влак да Марий Элысе Тазалык аралтыш министерстве деч 4 автомобиль. Боецна-шамычын йодмыштым шуктенна. Тылеч посна муниципал образованийлан вуйлатышышт шке районысо участник-шамычлан именной пӧлекым ыштеныт. Колоннын кугуракышт – МВД пеленсе мер ушем вуйлатыше Владимир Золотухин. Ончыч Луганск область, варажым Донецкий ден Херсонский областьлаште кодат, – увертарен Степан Воронцов.
Республик вуйлатыше гуманитар полышым погаш полшышо-влаклан тауштен. Тиде пашам чараш огыл, вет тудо кызыт элнам аралыше мемнан боецна-шамычлан моткоч кӱлешан.
Марий Эл Республикым вуйлатышын администрацийжын информаций паша пӧлкажын уверже негызеш Е.Эшкинина ямдылен.
