Марий Эл вуйлатыше Юрий Зайцев правительстве пӧртыштӧ республикым вияҥдымашке кугу надырым пыштыше-влаклан кугыжаныш наградым кучыктен. Пашаште сеҥымашке шумыжлан да кужу жап тыршымыжлан Марий Эл вуйлатышын советникше Анатолий Смирнов «Келшымаш» орден дене палемдалтын.
Тӱвыра сферыште кугу сеҥымашке шумыжлан В.Куприянов лӱмеш Микряк йоча музыкальный школын духовой инструмент классыште преподавательже Елисей Юшкин, физический культур ден спортым вияҥдымашке надырым пыштымыжлан Республиканский спорт школын тренер-преподавательже Александр Ястребов «За заслуги перед Марий Эл» орденын медальже дене палемдалтыныт.
Театр искусствым вияҥдымашке кугу надырым пыштымыжлан М.Шкетан лӱмеш Марий национальный драме театрын артистше Эдуард Яковлевлан «Марий Эл Республикын калык артистше» лӱмым пуымо.
«Марий Эл Республик наукын сулло деятельже» лӱмым Марий кугыжаныш университетын экономике да маркетинг кафедржын профессоржо Анатолий Смирнов налын.
«Марий Эл Республик образованийын сулло пашаеҥже чап лӱмым «Синяя птица» гуманитарный гимназий директорын воспитательный пашаш шотышто алмаштышыже Татьяна Бурова ден Йоча да самырык-влаклан тӱвыра полат директорын алмаштышыже Наталья Галямова суленыт.
Йошкар-Ола нотариальный округын нотариусшо Людмила Виноградова «Марий Эл Республикын сулло юристше» лӱмым налын.
Марий Эл вуйлатыше Юрий Зайцев нунын регионым вияҥдымашке пыштыме надырыштым палемден да чылаштланат ончыкыжым эшеат кугурак сеҥымашке шуаш тыланен.
Марий Эл вуйлатышын пресс-службыжын уверже негызеш Евгений Садовин ямдылен.
Снимкыште: Анатолий Смирнов республик вуйлатышын кидше гыч наградым налеш.
Денис Речкинын фотожо/Марий Эл вуйлатышын пресс-службыжо.
