Йошкар-Олаште илыше ик ӱдырамаш шояк банк пашаеҥ-влаклан ӱшанен да 4 миллион наре теҥге оксаж деч посна кодын.
Тидын нерген полицийыш 57 ияш ӱдырамаш шкеже йыҥгыртен каласен. Кок арня наре жап ондалкалыше-шамыч тудым уке улшо кредитым петырышашлан займым налаш тӱрлӧ йӧн дене таратеныт.
Август мучаште ӱдырамашлан палыдыме пӧръеҥ йыҥгыртен да банкын лӱдыкшыдымылыкым кораҥдыше службыжын пашаеҥже улмыж нерген ойлен. А йыҥгырже «+7499….» тӱҥалше номер гыч пурен. Пӧръеҥ увертарен, пуйто тудын картше гыч оксам налаш тӧчат. Шийвундым арален кодаш манын, улшо оксажым резерв счетыш кусараш темлен. Чылажат ӱшандарыше лийже манын, тылеч вара тудын дене ӱдырамаш, пуйто банкын вес пашаеҥже, мутланаш тӱҥалын. Садыже чыла банк картлажын номерыштым, пайдаланыме срокыштым да вес велне возымо кум цифрыштым каласаш йодын. Ӱдырамаш йодмым шуктен да чылаже 107 тӱжем теҥге оксаж деч посна кодын.
Но ондалкалыше-шамычлан тиде шагалла чучын да тудлан умбакыжат ондалкалаш тӱҥалыныт. Ынде увертареныт, пуйто палыдыме-влак тудын лӱмжӧ дене чылаже 10 миллион теҥгеаш кредитым налыныт. Нуным петыраш манын, икмыняр займым налаш темленыт. Тыгодым шояк пашаеҥ-шамыч ӱшандареныт: кредитым петырышашлан мыняр оксам налеш, чыла тидым банк пӧртылта. Ӱдырамашат ӱшанен да икмыняр кече жапыштак кум банкыште кум миллион наре теҥгем налын да мошенник-шамычлан кусарен. Тылеч посна тудо микрофинанс организацийыште, машинажым залогыш пуэн, 200 тӱжем теҥгем налын, тыгак 660 тӱжем наре теҥгелан чыла шке вкладшым петырен. Вара тиде оксамат аферист-шамычын счетышкышт колтен.
Жап эртымеке гына ӱдырамаш ондалалтмыжым умылен да полицийыш увертарен.
Кызыт тиде факт шотышто уголовный делам тарватыме шотышто йодыш каҥашалтеш. Уголовный розыск пашаеҥ-влак преступленийым ыштыше еҥ-шамычым кычалыт.
Л.КАМАЛЕТДИНОВА
