Элнам аралат, тыныс верч кредалыт

9 декабрьыште Йошкар-Олаште Геройын кечыжлан пӧлеклалтше торжественный мероприятий эртен.
Торжественный мероприятий Йошкар-Оласе рӱдӧ паркыште, Шарнымаш мемориал воктене эртен. Участник-влак Воин чап монумент ден Курымашлык тул воктеке пеледыш аршашым пыштеныт, ик минут шып шогеныт.
Регион вуйлатыше Юрий Зайцевын кӱштымыж почеш тушто правительстве председательын икымше алмаштышыже Евгений Курмаев лийын. Тушто тыгак ветеран организацийла гыч еҥ-шамыч, военнослужащий, студент, школьник-влак ушненыт.
Тыглай огыл саманыште элнан ӱшанле эргыже-влак специальный военный операцийыште порысыштым шуктат, патырлыкым ончыктат.
– Поснак кугу тау специальный военный операцийын участникше, элнам аралыше-влаклан. Герой-шамыч кеч-могай неле жапыште шке патырлыкышт дене ойыртемалтыт, – ойлен Российысе Военно-исторический обществын регионысо пӧлкажым вуйлатыше Евгений Кузьмин.
– Кочана, кугезе кочана-влакым подвигыштлан тауштен шарналтена, вет Кугу Отечественный сарыште элнан тынысше верч кредалыныт. Нунын патырлыкышт элнан историешыже ӱмырешлан кодын, – палемден регион вуйлатыше.
Марий Эл вуйлатышын пресс-службыжын уверже негызеш Елена Эшкинина ямдылен.