Самырык-влак тиде жапым вучат, но тыгодым лӱдытат. Тидын деч кораҥаш, нуным ты ответственный татлан ямдылаш манын, пытартыш жапыште тӱрлӧ акцийым, военно-патриотический шӱлышан мероприятийым эртарат.
Мутлан, шукерте огыл Волжскышто призывник-влакым саламленыт. Тыгодымак ӱдыр ден рвезе-влак военный пашалан ямде улмыштым ончыктеныт. Нуно лӱйылтыныт, саркуралым рончен погеныт. Лӱйылтмаште туралыкым, тӱткышым тергеныт гын, саркуралым рончен погымаште – писылыкым.
Кажныже тыршен, ойыртемалтын. Ӱдыр-влакат почеш кодын огытыл. Теве К.Кисилёв (6-шо №-ан школ) эн сай лӱйылтшӧ семын палемдалтын. Жапше – 21,6 секунд.
– Калыкыште кеч-мом ойлат гынат, армий да кугыжанышын полышыж деч посна ме илен огына керт. Армий чын пӧръеҥым ышта, – палемден Волжский районысо да Волжск оласе военный комиссар А.Николаев.
А 23-26 ноябрьыште Волжскысо Российын Геройжо Валерий Иванов лӱмеш 2-шо №-ан школын кышкарыштыже регион-влак кокласе «Ме патриот улына!» VII патриотический фестиваль эртен. Тушко военно-патриотический клуб ден ушемыште шотлалтше Марий Эл, Татарстан Республик да Киров область гыч 90 наре участник ушнен.
Тыгай мероприятий самырык тукымым патриот шӱлышеш да духовно воспитатлыме дене кылдалтын. Тыгак тудо ӱдыр ден рвезе-влак коклашке таза илыш-йӱлам шарыме семын эртаралтеш.
Тек чылан обществыште кӱлешан улмыштым шижыт.
Е.Эшкинина.
